DILI, STLTIMORLESTE.com – Relasiona ho aimoruk balun neebe stok hotu iha hospital nasional nomos iha sentru saude sira, halo pasiente sira sente triste no rekomenda ba governu liu husi Ministeriu Saude (MS), atu aimoruk labele falta iha hospital sira. Atu nunee bainhira povu sira mai konsulta bele simu aimoruk ho kompletu hodi hemu iha uma.
Pasiente Diabetes, Esmeralda da Silva Rodrigues husi Munisipiu Ermera dehan, nia sente triste oituan tanba ohin mai konsulta tiha, maibe aimoruk diabetes laiha. Nia simu deit mak vitamina maibe aimoruk ba diabetes nian laiha, nunee nia simu reseitas hodi ba sosa deit iha klinika privadu no mai fali hospital depois semana ida. Aimoruk neebe iha reseita laran hakerek ho naran metformin 500 g mak laiha, entretantu vitamina B6 mak iha.
“Vitamina mak hau simu tiha ona, maibe aimoruk raan midar mak laiha. Sira dehan semana oin mak mai foti. Aimoruk raan midar nee sira fo reseita hodi ba sosa iha apotik. Hau osan laiha atu sosa, hau mai foti deit mak ida nee. Hau husu ba governu liu husi Ministeriu Saude atu aimoruk labele falta iha hospital,” dehan nia ba jornalista sira iha HNGV, Segunda (10/08/2026).
Nia katak, nia simu deit reseita nee maibe la ba sosa. Basa aimoruk diabetes reserva hanesan musan ida rua fulan kotuk nian sei iha hela. Tanba labele hein too hotu mak mai foti, neebe rezerva nee sempre iha. Maibe dala ruma nee sosa deit tablet ho folin US$ 3, aimoruk tablet ida iha deit musan 6. Sosa dala ida nee too tablet 4 ka 5 hanesan nee.
“Kuandu hotu no laiha ona pasiensia ba sosa deit ona. Hau sosa nee ba dala rua ona, sosa too tablet 4 too 5 hanesan nee. Ami konsumu aimoruk nee too mate deit karik, hau la hatene. Sekuandu la hemu nee, ita sente kolen hela deit no ba haris fatin sintina kiik nee beibeik hela deit. Maibe kuandu hemu tiha aimoruk nee, entaun normal fali,” katak nia.
Nia hatutan, neebe tenke hemu duni aimoruk nee para sente diak. Aimoruk Timor nian hemu ba mos la pasa. Moras nee kuaze tinan rua nia laran ona.
Nunee mos Pasiente Jaimitu da Cruz dehan, nuudar povu no pasiente sente riste tebes ho kondisaun hospital nasional ida neebe falta aimoruk hodi fo ba moras sira neebe mai halo konsulta.
Nia haktuir, sai husi uma lori moras mai konsulta iha hospital nee ho esperansa atu hetan konsulta husi doutor para bele simu netik aimoruk ruma, maibe mai mak hasoru fali situasaun hanesan nee halo ema laran moras kahur mos ho nervozu.
“Ita mai konsulta tiha ho mediku sira, too atu foti aimoruk mak parte farmasia dehan aimoruk laiha fali. Rona ida nee halo ita triste, no kahur mos ho nervozu oituan,” dehan nia.
Nia parte husu ba governu atu rezolve situasaun sira nee hodi prepara aimoruk iha hospital sira ho masimu, atu nunee povu sira labele laran susar.
Nunee mos Komunidade Carlota Menezes katak, triste ba konsulta tiha mak too fatin atu foti aimoruk nian, farmasia sira fo deit reseita ba sosa iha klinika sira. Povu balun neebe laiha duni osan nee sente triste, entaun sira simu deit mak reseita nee maibe fila uma ho liman mamuk.
(dom)
