BAUKAU, STLTIMORLESTE.com – Pasiente neebe baixa iha Hospital Rejional Eduardo Ximenes (HoREX) Baukau konsumu hahan ho modo ikan no naan husi jeleira.
Diretor Ezekutivu HoREX Baukau, Claudino Ximenes aprezenta, hahan neebe oferese ba pasiente sira iha sala baixa HoREX Baukau, durante nee lao tuir padraun neebe establese husi Ministeriu Saude, maibe rekonhese iha difikuldade mak stok hahan lokal neebe fornese ba tein liu-liu modo sei menus, hodi difikulta fornesedor tuir padraun neebe estabelese ona husi Governu.
“Ida problema mak nee liu-liu naan sira, ami nia hakarak naan ikan sira nee fo fresku, labele fo ikan naan jeleira, maibe fo naan fresku ikan sira husi tasi, maibe kompanhia sira nia preokupasaun mak nee, dala ruma la hetan fresku entaun oferese nafatin ida nee,” Diretor Ezekutivu HoREX, Claudino Ximenes ba jornalista sira iha nia knaar fatin HoREX Baukau, Segunda (13/04/2026).
Nia sublina, fornese hahan liu-liu modo laos husi kondisaun fresku ba pasiente sira, parte HoREX fo ona samada atensaun ba kompanhia fornesedor, tanba la tuir padraun neebe Governu estabelese, maibe tenke akontese, tanba razaun laiha stok iha merkadu.
Nia fundamenta, mezmu kondisaun nunee, maibe parte nutrientes sira kada loron mantein akompanha hahan no oferese hahan ho kondisaun diak ba pasiente sira.
“Se hahan ladun diak sira mos dehan para labele, mais ami buka ida kondisaun diak nee mak sira oferese ba moras sira nee,” Claudino akresenta.
Enkuantu pasiente sira neebe baixa iha HoREX Baukau kada loron hahan antes konsumu aimoruk hanesan dader matabisu iha oras 06:00, merenda dader 09:00, meudia oras 12:00, lorokraik merenda oras 18:00 no kalan tarde liu tuku 08:00.
Entretantu antes nee Gabinete Etika Deontolojika no Garantia Qualidade (GEDGQ) Ministeriu Saude halao vizita iha HoREX Baukau, ho objetivu observa direta situasaun iha neebe deteta katak kompanhia fornesedor la kumpri tuir menu ai-haan neebe prepara husi Nutrisionista iha HoREX Baukau.
(tom)
