DILI, STLTIMORLESTE.com – Pasiente neebe durante fulan 2 too 3 simu aimoruk la kompletu depois halo kontrola moras iha Hospital Nasional Guido Valadares (HNGV), daudaun nee sente kontente tanba simu aimoruk kompletu.
Pasiente defisiente mental balun neebe halo konsulta tinan barak iha HNGV, iha fulan 2 too 3 liu ba labele simu sira nia aimoruk ho kompletu tanba stok hotu, maibe iha fulan nee sira sente kontente tanba bele simu aimoruk ho kompletu. Se lae kada semana tenke ba cek fali aimoruk esensial balun neebe hotu, maibe laiha nafatin.
Pasiente Ajeca Costa dehan, fulan nee ba halo konsulta ho doutor espesialista sira hodi haree progresu kondisaun moras nian. Depois konsulta dotor sira sona, no fo reseita hodi simu aimoruk. Nunee mai foti aimoruk iha farmasia HNGV, iha fulan Jullu nian la hanesan ho fulan sira liu ba kotuk simu la kompletu sempre menus tiha aimoruk oin ida ou rua, dala ruma simu ida ou rua deit. Neebe fulan ida nee foin simu kompletu fali.
“Hau senti kontenti, tanba ohin ba konsulta iha HNGV, hasoru mediku espesialista sona no fo aimoruk. Aimoruk neebe dotor fo, hau lori ba simu iha farmasia aimoruk sira nee kompletu. La hanesan ho fulan sira antes nee hau ba simu la kompletu. Sira haruka fali hau ba cek fali depois semana ida, maibe depois semana id aba fali situasaun nafatin mak laiha hela deit,” dehan nia ba STL iha Bidau, Kinta (09/07/2026).
Nia hatete, aimoruk neebe simu ba nia moras nee baibain simu oin tolu. Aimoruk nee mak hanesan promawell-25, medepine-200 no diazepam.
Nunee mos pasiente raan midar Anastasia katak, kada fulan sempre ba halo konsulta ho doutor sira iha HNGV, maibe aimoruk neebe simu mak dala ruma la kompletu. Neebe bainhira simu aimoruk kompletu nee, hanesan pasiente sente kontente tebes.
Entretantu Diretor Ezekutivu HNGV, Nuno Vital Soares katak, administrasaun hospital sei kontinua melhora diak liu tan iha atendimentu ekipamentu sira. HNGV mos hetan aimoruk husi INFPM hodi asegura pedidu ba tinan ida nee nia laran.
“Ita boot sira hatene katak, ami mos hetan aimoruk husi INFPM, entaun ami ho planu kualitifikasaun, entaun ami asegura pedidu ba tinan ida nee nia laran. Tinan ida nee ami sei investe barak iha ekipamentu,” dehan nia.
(dom)
One Response
Hau hanesan profesional Farmaseutico husu ba Ministeriu saude tau atensaun maximu ba parte INFPM hodi garante stock aimoruk no produto medicinais, labele ajudika kontratu ba kompania foun nbe laiha osan no Esperiensia hodi prejudika ba stock aimoruk no fornese aimoruk la iha kualidade.