BAUKAU, STLTIMORLESTE.com – Provedoria Direitu Umanus no Justisa (PDHJ – sigla portugues) simu keixa husi Delegasaun Territorial Baukau hamutuk 12, neebe inklui mos negosiante sira keixa Autoridade Munisipiu Baukau, tanba konsidera viola Direitu Umanu.
PDHJ, Virgílio da Silva Guterres hateten, kazu rejistu husi PDHJ Delegasaun Territorial Baukau husi vitima sira no kontinua relata ba PDHJ nasional hamutuk 12, kompostu kazu boa governasaun tolu no viola direitu umanus sia neebe inklui Autoridade Munisipiu Baukau liu husi ekipa konjunta hssoru negosiante sira.
“Husi Baukau nian barak liu kazu direitu umanus, foin dadauk ami haree keixa ida, autoridade sira halo agresaun ou intervensaun neebe halo inan feton balun sente dignidade laiha,” hateten Virgílio ba jornalista sira iha Uatulete, Baukau, Segunda (14/04/2025).
Provedor nee esplika, keixa 12 kompostu boa governasaun tolu mak hanesan hasoru Ministeriu Edukasaun kona-ba la extende kontratu ba profesores kontratadu neebe hapara no seluk tan nomos viola direitu umanus mak hanesan, Autoridade Munisipiu Baukau liu husi ekipa konjunta atua negosiante iha merkadu tuan vila nova, neebe negosiante ida lakon dignidade, inklui Xefe Suku balun tenta kastigu jovem sira nomos autoridade komunitariu komete abuzu seksual hasoru feto balu.
Nia argumentu, prosesu keixa sira labele esplika klaru, tanba keixa sira hahu husi PDHJ Delegasaun Territorial Baukau hafoin submete ba sentral hodi kontinua ba Komisaun Jestaun Keixa (KJK) hodi submete ba investigasaun.
“Kazu balun ami hakerek karta mai Polisia halo investigasaun, balun ita haruka ba Ministeiru Edukasaun, kazu krime ami halo notisia krime ba Ministeiru Publiku,” Virgílio katak
Entretantu keixa 12 Provedoria Direitu Umanus no Justisa lori kazu rua ba prosesu investigasaun.
(tom)
