BAUCAU, STLTIMORLESTE.com – Projetu sira husi Programa Dezenvimentu Integradu Munisipal (PDIM) tinan 2026 nian, Autoridade Munisipal Viqueque liu husi kompanhia manan nain sira sei lansa iha tempu besik.
Prezidente Autoridade Munisipiu Viqueque, Francisco Cruz Simões de Gonzaga Soares aprezenta, tinan fiskal 2026 nee Munisipiu Viqueque hetan projetu husi PDIM hamutuk 14 sei kobre ba infraestrutura ba setor agrikultura, saude, edukasaun no setor turizmu.
“Implementasaun haree ba kalendariu 40 dias fulan oin bele ona implementa, tanba ita iha ona kompanhia vensedor hein prosesu pagamentu 20% para sira bele hahu ona servisu,” hateten Prezidente Autoridade Munisipiu Viqueque, Francisco Cruz Simões de Gonzaga Soares ba STL liu husi telefone, Tersa (02/06/2026).
Nia esplika, PDIM 14 nee kobre konstrusaun irigasaun Laudei Leba Crabi iha Postu Administrativu Uatucarbau, Suku Irabin de Cima, konstrusaun sentru saude internamentu Uatulari iha Suku Matahoi, konstrusaun merkadu Bebui, Postu Uatulari, iha Suku Afaloicai, konstrusaun armajen agrikultura produtu lokal inklui moru iha Postu Administrativu Viqueque, Suku Uma Uain Kraik.
Konstrusaun fatin turizmu istoriku Bahaneo Ossu fatin tiru monu aviaun helikopteru Indonezia, konstrusaun Postu Saude iha Loi-Ulo Uatucarbau, reabilitasaun no espansaun fatin turizmu Welulimanas Uaimori, konstrusaun edifisiu foun ba pre-eskolar Kakatua Lugasa inklui moru protesaun.
Konstrusaun irigasaun Uaiboru-Naha iha Suku Bahatata, konstrusaun fatin turizmu Fabo ba We-Tasi iha Suku Ahic, konstrusaun Postu Saude Bualale iha Suku Irabin de Baixo, konstrusaun irigasaun tuan ba Natar Lafaek Hasan iha Suku Luka, konstrusaun fatin turizmu Didimera iha Suku Vesoru no konstrusaun irigasaun Aenau Ossoroa, iha Postu Administrativu Ossu, Suku Ossoroa.
“Ita hahu ho projetu kiik, maibe ita hahu halo buat ruma priense ona ita nia kondisaun minima responde ba avaliasaun kondisaun manimu katak preparadu ba dezentralizasaun poder lokal nee,” Francisco komenta.
Prezidente Autoridade Munisipiu Viqueque nee konsidera, projetu sira husi PDIM ba kada Munisipiu inklui Munisipiu Viqueque neebe iha tinan 2026 nee hetan projetu 14, mezmu ho projetu kiik, maibe hahu no prepara infraestrutura bazika sira iha Munisipiu hakat ba Governu lokal, neebe tuir planu eleisaun sei realiza iha tinan 2027.
(tom)
