DILI, STLTIMORLESTE.com – Ensinu Baziku Filial (EBF) Hans-Klem, Bairo Pite, halo ona pedidu ba Ministériu Edukasaun (ME) atu hetan apoiu meza no kadeira ba sala aula, maibé to’o agora seidauk hetan resposta husi parte ME.
Lia hirak ne’e hato’o husi Kordenadora EBF Hans-Klem, Bairo Pite, Celina Maria da Costa ba STL iha nia knar fatin, Tersa (29/09/2026).
Celina hatete katak, eskola presiza aumenta meza no kadeira, liuliu ba sala aula ne’ebé meza no kadeira sira aat ona.
“Hau nia sala haat nee mak atu aumenta meza no kadeira. Pedidu husu meza no kadeira nee hatama ona ba ME liu husi servisu lojístika. Hau husu meza no kadeira ba ami nia sala ensinu-aprendizajen haat, maibé to’o agora seidauk hetan resposta husi parte ME,” nia dehan.
Nia hatutan katak, meza no kadeira ne’ebé uza iha sala aula balun aat ona, tanba ne’e eskola halo pedidu atu hetan meza no kadeira foun hodi fasilita prosesu ensinu-aprendizajen ba estudante sira.
“Agora dadaun iha sala laran nee meza kadeira aat deit. Ho ida nee, sira halo ona pedidu ba ME, para bele fó apoiu meza no kadeira ba ami nia eskola. Tanba meza no kadeira ne’ebé dadaun iha aat ona, presiza apoiu foun hodi bele fasilita estudante sira,” nia afirma.
Celina espera, ME bele fó resposta ba pedidu eskola nian, hodi sala aula hat bele hetan meza no kadeira foun ba estudante sira.
Iha fatin seluk, Kordenador EBF Fatumeta, Jose Manuel Guterres hatete, fasilidade meza no kadeira ba estudante sira iha sala aula sufisiente hela, nunee estudante sira bele uza durante prosesu ensinu-aprendizajen.
“Konaba ami nia meza no kadeira ba ita nia estudante sira iha sala sufisiente hela. Maibé númeru estudante sira kada tinan sempre iha mudansa, tanba depende ba estudante ne’ebé mai rejistu,” nia dehan.
Entretantu, Kordenadora EBF Naroman, Joana Teresa Freitas, hatete katak meza no kadeira iha eskola ne’e sufisiente, nunee estudante sira bele uza durante aula no laiha problema kona-ba fasilidade refere.
“Konaba meza no kadeira iha ami nia eskola laiha problema, tanba ami nia estudante sira uza hodi tuir aula,” nia katak.
(jac)
