DILI, STLTIMORLESTE.com – Klinika Hato-Lelo iha Suku Mau-Ulo, Postu Ainaro iha kondisaun grave tanba pesoal saude sira obriga hela iha klinika laran no iha tempu hanesan ameasa mos husi rai halai bainhira udan tama ka mai.
Kestaun ne’e hato’o husi Xefe Suku Mau-Ulo, Luis Valadares Colaço ba STL, liu husi telefone, Kuarta (16/09/2026).
“Uma klinika ka Postu Saude iha Hato-Lelo, Suku Mau-Ulo nia kondisaun la diak. Elektrisidade diak, bee moos diak hela, maibe problema boot liu maka pessoal saude hela iha postu saude refere,” Luis Valadares Colaço hatete.
Nia esplika, pessoal saude sira hela deit iha postu saude laran tanba laiha uma propriu, ne’ebe difikulta atendimentu ba komunidade.
“Presiza hadia ka halo uma ba pessoal saude atu nune bele halo atendimentu ba komunidade,” nia hatutan.
Aleinde ne’e, nia hatete postu saude refere iha risku boot ba rai halai.
“Postu Saude ka Klinika refere hetan ameasa husi rai halai. Ne’e duni husu ba Ministeriu Saude atu tau prioridade ba ami nia postu saude ka klinika refere ho urjente. Sekarik tempu udan agora sei fo impaktu boot ba klinika refere,” nia hatete.
Tuir nia, bainhira udan boot rai halai bele sobu klinika ne’e no komunidade sei lakon asesu ba saude.
Iha parte ketak, Observador Politika, Jose Soares hatete problema Klinika Hato-Lelo hatudu Governu seidauk iha planu mitigasaun dezastre ba fasilidade publiku.
“Se ita hatene ona klinika ameasa rai halai, Ministeriu Saude ho Ministeriu Obras Publikas tenke tun kedas halo estudu. La bele hein to’o rai halai sobu tiha mak foin foti asaun. Saude ne’e direitu baziku, Governu tenke garante pesoal saude iha fatin seguru atu servi komunidade,” Jose Soares hatete.
Nunee mos Akademista UNTL, Silveiro de Araujo hatete kondisaun iha Hato-Lelo reflete problema jestaun rekursu umanu iha area rural no presiza solusaun permanente.
“Problema uma ba pesoal saude ne’e problema nasional. Oinsa atu servisu diak se laiha fatin deskansa dignu? Tenke kria kondisaun no haree ba risku ambiental iha Hato-Lelo,” Silveiro de Araujo hatete.
Entretantu to’o notisia ne’e publika, STL seidauk halo konfirmasaun ho Ministeriu Saude.
(car)
