AMBENO, STLTIMORLESTE.com – Pesoal Saude husi Postu Saude Sakato halao tratamentu Saude ba povu sira iha Fronteira Sakato, Bairru Meobola, Aldeia Sakato, Suku Nipane, Postu Administrativu Pantemakassar, Rejiaun Administrativa Espesial Oecusse-Ambeno (RAEOA).
Tuir Mediku Jeral Postu Saude Sakato, Octavia Lorenca Pinto dehan, kada fulan Postu Saude Sakato, sempre halao mobile klinika no vizita domisiliariu iha kada bairru, hahu husi Bairru Bausiu, Oebon, Sakato no Meobola, tanba nee durante halao mobile klinika, moras aas neebe identifika iha tempu Bailoron maka moras Infeksaun Respiratoriu (ISPA), tuir mai maka moras tuberkloza no moras seluk-seluk tan.
“Ami iha Postu Saude Sakato, kada fulan sempre halao programa Siska, PIS, mobile klinika no vizita domisiliariu maibe ba programa Siska ho PIS, ami hein deit husi Sentru Saude Kiumaonteko kuandu iha ona planu no programa ona katak iha fulan ida nee, mai halao iha Suku Nipane, entaun ami husi Postu Saude Sakato, ami apoiu programa nee, tama sai Bairru hodi fo tratamentu saude ba komunidade sira, alende nee mos ami tetu labarik sira nia todan husi tinan 5 mai kraik, neebe kuandu programa atu halao, sempre aviza uluk ba lider komunitariu sira hodi fo organiza povu atu partisipa iha iha programa sira nee,” dehan Mediku Jeral Postu Saude Sakato, Octavia Lorenca Pinto ba STL iha fronteira Sakato, Bairru Meobola, Suku Nipane, Postu Administrativu Pantemakassar, RAEOA, Kinta (09/07/2026).
Nia haktuir tan katak, iha Postu Saude Sakato, sempre halao mobile klinika nomos vizita domisiliariu kada fulan iha bairu no aldeia sira hanesan Aosnak, Bausiu, Oebone, Sakato, Meobola iha fronteira nee.
“Durante ami halao programa mobile klinika no vizita domisiliariu iha kada bairu, moras neebe maka ami rejistu moras aas maka ISPA ida nee moras hadaet nomos moras la hadaet maka hipertensaun mos barak, neebe kada loron pasiente neebe maka halo tratamentu saude iha Postu Saude Sakato 30 ba leten neebe kada fulan bele too 400 no kona ba mobile klinika, komunidade barak iha bairru nee partisipa masimu,” haktuir nia.
Iha biban nee, nia husu nafatin ba povu atu kontinua hakbesik aan ba postu saude neebe besik inklui mos programa mobile klinika, tenke hakbesik ba fasilidade saude nee, tanba governu kada tinan aprova osan barak hodi sosa aimoruk no harii sentru saude no postu saude atu fo tratamentu saude ba komunidade ho gratuita, kompara ho nasaun seluk kuandu ninia povu atu halo tratamentu saude, sempre selu, iha TL sei grauita.
Iha biban nee, Antonia Suni nuudar komunidade fronteira Sakato sente kontente tanba kada fulan, pesoal saude sira husi Postu Saude Sakato, sempre vizita povu kada bairu-bairru iha Suku Nipane, hodi fo atendementu saude ba povu.
“Ami sente kontente tanba kada fulan, pesoal saude sira sempre halao vizita domisiliariu nomos halao mobile klinika iha bairu-bairu, atu nunee hakbesik ba povu no fo tratamentu saude, tanba kada loron povu neebe sente moras maka ba postu saude, maibe sai hanesan nee, sempre involve povu hotu hodi hetan tratamentu saude liu husi koko sira nia tensaun no iha okaziaun nee, povu foin esklares sira nia moras ba doutor no infermeiru sira hodi hetan aimoruk, neebe ita agradese tanba oras nee dadaun aimoruk sei gratuita,” dehan nia.
Nunee mos Delviana Teme hatoo sentimentu alegria no kontente tanba husi parte saude mai vizita sira no fornese aimoruk oral ba sira hodi hemu, tetu labarik sira nia todan, liu-liu labarik husi idade 5 ano mai kraik.
“Ami rekomenda nafatin ba pesoal saude sira iha Postu Saude Sakato ho sentru saude Kiumaonteko, atu kontinua tau matan ba ami povu liu husi programa vizita domisiliariu, Mobile Klinika ho Siska, atu nunee ami hetan tratamentu saude no simu aimoruk,” dehan Delviana.
Tuir observasaun STL iha Fronteira Sakato, Funsionariu sira husi Alfandega, Imigrasi inklui Bea Cukai, hakbesik aan mos ba iha mobile klinika hodi hetan mos tratamentu saude, nunee mos aproveita koko sira nia tensaun.
(jos)
