DILI, STLTIMORLESTE.com – Ema neebe moris ho hahalok aat, moris ho planu aat ba ema seluk nia susesu sei izola aan ho Maromak no ba ema seluk.
Lia hirak nee hatoo husi Rikardus Pasang, SVD ba STL Segunda (20/07/2026) hatete, dala barak ema halo planu aat ba nia maluk seluk nia susesu hanoin Maromak laharee, maibe Maromak hatene saida mak ema halo loron ba loron, tanba nee bainhira halo hahalot hasoru nia maluk sei izola aan ho Maromak no seluk iha nia moris tomak.
“Iha fuan balun neebe halo planu aat iha nakukun, hakarak sasan ema seluk nian, haluha katak Maromak bele haree. Buat aat sei hamosu laloran moris, Sei isola aan moris nee ho ema seluk! Maibe haree ba Nia, neebe la hatohar sanak ida neebe la hamate lampra neebe besik atu mate. Jesus lao ho pasu kalma no hakmatek, Fo isin diak no hadomi ho laran luak,” dehan Padre.
Iha biban nee Padre husu ema hotu nafatin nakonu ho domin tane malu ho buat neebe iha hodi moris tuir Maromak nia hanorin sira iha moris loron-loron nia.
“Ohin, mai ita sai liman neebe mamar iha mundu neebe makaas. Laos atu foti, maibe atu hakoak. Laos atu hatudu sala, maibe atu fo forsa. Tanba iha neeba Maromak hela,” dehan Padre Rikardus.
Nunee mos Padre Paul Kerans SVD hatutan refleksaun ba lorobn segunda ohin foti husi Evanjellu Mateus 12:38-42 hatete Jesus Mestre maibe ema la fiar no odi tan maske Jesus halo milagre.
“Ema Farizeu no eskriba sira mak ema laran makerek iha Jesus nia tempu. Iha Evanjellu ohin nian, sira bolu Jesus “Mestre”, maibe sira la fiar Nia no, sira odiu nia. Sira husu sinal ida atu halo sira fiar katak Jesus mak Mesias duni, maski sira haree ona milagre barak, inklui kura mane ida neebe anju aat domina. Buat hotu neebe sira hakarak maka atu dezakredita Nia. Jesus hatene saida mak iha sira nia laran, tan nee Nia lakohi fo sinal ruma ba sira,” katak Padre Paul.
Iha biban nee Padre husu ema idak idak halo refleksaun ba nia aan hodi lao tuir dalan neebe Jesus hanorin no labele laran moras malu no odi malu.
“Ita nia motivu mak bele determina ita nia susesu ka fallansu. Se ita nia intensaun sira moos, ita nia hakarak sira sei hetan. Se lae, ita sei hetan kastigu. Mai ita ezamina ita nia hanoin no hakarak sira. Ita hakarak buat neebe diak ba ita nia aan rasik no ba ema seluk ka lae? Se lae, ita presiza arrepende no rona ba Maromak nia liafuan, hanesan ema Nínive, atu ita bele hetan salvasaun,” katak Padre.
Bibi Atan Kreda Katolika nee dehan hanesan eskriba no farizeu sira, ohin loron mos hakarak buat neebe ordenadu, lojiku no bele prova. Maibe hahalok aat no laran laek nafatin ukun ema nia fuan.
Jesus nia mensajen ba ema simples tebes, fila husi ema sala sira no fiar iha Nia. Nia mak sinal loos mesak, katak sinal Maromak nia domin no kbiit ba ema, Amen.
(eme)
