DILI, STLTIMORLESTE.com – Deputada husi Partidu PLP preokupa tanba Governu lansa ona Konstrusaun Internasional Convention Center (ICC) maibe la preve orsamentu, ho preokupasaun nee Primeiru Ministru Kay Rala Xanana Gusmão hatete, laos ohin lansa aban harii ona, maibe presiza tempu.
Primeiru Ministru Kay Rala Xanana Gusmão hatoo resposta nee ba jornalista sira, bainhira remata halo enkontru semanal ho Prezidente Republika Jose Ramos Horta iha palasiu Prezidensial Nicolau Lobato, Bairo Pite, Sesta (05/06/2026).
Primeiru Ministru hatete, liga ho lansamentu ba konstrusaun konstrusaun International Convention Centre (ICC) nuudar simbolu ba dezenvolvimentu nasional hodi prepara ba eventu internasional Simeira The Association of Southeast Asian Nations (ASEAN) iha tinan 2029, no Governu mos hatoo on aba deputadu sira nia katak laos ohin lansa aban harii kedas.
“Loron ida ami fo hatene tiha ona dehan depois mak haree, tanba buat nee laos halo lansamentu premeiru pedra laos aban nee harii ona, ohin mos prezidente husu imi halo lansamentu aeroportu nia nunka mai realiza,” katak PM Xanana.
Aleinde nee Governu diskute ona ka lae? Ema balun hodi troka Matebian Ministru Ensinu Superior Siensia no Kultura, Jose Honorio ka lae? Hatan ba kestaun nee Primeiru Ministru hatete, daudaun nee Governu hein hela Visi Primeiru Ministru Mariano Assanami, tanba daudaun nee iha hela rai liur tanba Governu ida laos CNRT deit maibe Governu husi CNRT no PD, no matebian Ministru nee mai husi Partidu PD, tanba nee Governu koalia ona.
Lo-loos aprezenta iha Kuarta ida nee mai, tanba Visi Primeiru Ministru sai tiha ona tanba hein visi PM Asanami fila mak sei koalia assuntu nee.
Aleinde nee xefe Bankada PLP, Deputada Maria Angelina Sarmento preokupa ho prosesu konstrusaun ba Internasional Convention Center (ICC) neebe lansa ona fatuk dahuluk maibe governu la aloka orsamentu iha Orsamentu Jeral Estadu (OJE) 2026 hodi konstrui.
Deputada dehan, Kontrusaun ba Internasional Convention Center neebe mak governu lansa ona fatuk dahuluk, maibe iha ka lae orsamentu neebe aloka iha OJE 2026 atu halo konstrusaun, se la sala halo ona lansamentu primeiru pedra mais la iha previzaun ba ida nee.
Deputada Maria apresia IX Governu Konstitusional hahu prepara kondisaun sira wainhira Timor Leste sei sai prezidensia ba ASEAN summit iha 2029 liu husi konstrui ICC.
Tan nee Parlamentu husu governu presiza aprezenta orsamentu nunee bele garante akuntabilidade no transparansia tanba orsamentu neebe governu aloka ba konstrusaun nee povu nian.
Vise Primeiru Ministru no Ministru Koordenador Asuntu Ekonomiku (MAKE) no Ministru Turizmu Ambiente, Francisco Kalbuadi Lay katak, Projetu konstrusaun Internasional Convention Center nee hanesan projetu interese nasional, rejional no internasional.
Kalbuadi dehan, nia labele responde preokupasaun deputada Maria Angelina Sarmento kona ba orsamentu neebe sei aloka ba konstrusaun Internasional Convention Center iha ambito debate orsamentu retifikativu nee maibe nia prontu mai hatan iha tempu seluk
Projetu nee responsabiliza husi Vise-Primeiru-Ministru no Ministru Koordenador ba Asuntus Ekonomikus no Ministru Turizmu no Ambiente, Francisco Kalbuadi Lay ho membru Governu tuteladu sira. Konstrusaun ba projetu nee ezekuta husi Kompania Internasional husi Xina, Shaanxi Constrution Engineering Group Coporation Limited Premium Project.
(eme)
