DILI, STLTIMORLESTE.com – Primeiru Ministru (PM), Kay Rala Xanana Gusmão lansa programa formasaun, sertifikasaun no lisensiamentu ba ekipamentu altu risku.
Lansametu nee halao iha Lecidere, no programa nee realiza tanba Institutu Jestaun Ekipamentus no Apoia ba Dezenvolvimentu Infrastrutura, Institutu Publiku (IGEADI.IP) estabelese kooperasaun ho kompanhia licensing.tl, ISAT no IS Australia hodi fornese formasaun altu nível kumpri padraun internasional no industria global.
Primeiru Ministru Xanana louva inisiativa nee, tanba servisu laos deit tur iha komputador oin, maibe bele servisu iha kualker area neebe konsidera bele hodi partisipa iha dezenvolvimentu nasaun nian.
“Ita iha hela dalan ba dezenvolvimentu, maske seidauk bele halo buat hotu-hotu, ikus mai ita sei enfrenta nesesidade barak tebes. Parabens ba Ministériu Obras Públikas, IGEADI no kompanhia licensing.tl. Parabens mós bá F-FDTL neebé involve mos iha programa nee”, katak PM Xanana liu husi komunikadu neebe STL asesu Sesta nee.
Xefe Governu fo hanoin katak, nasaun iha militar laos atu halo funu maibe atu ajuda populasaun, nee duni programa nee diak tanba bele kapasita membru F-FDTL sira hodi apoia povu. Husu mos katak bainhira mosu situasaun emerjensia F-FDTL rai hela kilat iha kuartél Jeneral hodi tun ba ajuda povu bainhira hasoru inundasaun.
Iha fatin hanesan, Prezidente Konselhu Administrasaun IGEADI, I.P, Ana Paula da Cruz ho esperansa katak, lansamentu ida nee marka duni inísiu husi inisiativa ida neebe sei lori impaktu boot no klean bá Timor-Leste nia sustentabilidade dezenvolvimentu sosial, ekonomia nasional no futuru Timor nia partisipasaun iha progresu dezenvolvimentu internasional.
“Bainhira hahu hakat ba oin iha jornada importante ida nee, ita mós rekoñese ho diak katak, programa formasaun, sertifikasaun no lisensiamentu ida nee, sei fo influensia progresiva”, tenik nia.
Fiar katak programa ida nee sei oferese importansia signifikativu ba dezenvolvimentu infraestrutura.
Programa ida nee realiza ho klasifikasaun modu oin tolu neebé kategorizadu hanesan, formasaun, sertifikasaun, no lisensiamentu.
Programa ida nee realiza laos atu fo formasaun deit ba individual atu halo operasaun ba ekipamentu sira, maibé substánsia programa nee realiza atu hakbiit no hametin TL nia forsa traballu no asegura mos katak TL nia operador sira hetan sertifikadu neebe aliña tuir konformidade padraun industria global.
Kompanhia Licensing.tl, ISAT no IS Australia iha ona esperiensia tinan barak halao atividade iha area formasaun, sertifikasaun no lisensiamentu iha Timor Leste no Austrália iha area industria espesifiku sira hanesan area industria sivíl no area industria rekursu enerjia ba atividade petroléu, gás no minerál.
Kompanhia nee mos estabelese ona sira nia baze Eskritoriu no atividade iha Timor-Leste desde tinan 2010.
Iha lansamentu nee funsionáriu IGEADI, I. P ho membru F-FDTL halo mos simulasaun ba operasaun ekipamentu pezadu sira.
Partisipa iha eventu nee mak hanesan Xefi Estadu Maiór Jeneral F-FDTL, Tenente Jenerál Falur Rate Laek, Embaixador Japaun iha Timor Leste, Tetsuya Kimura, membru Governu, parseiru dezenvolvimentu sira no membru Polísia Nasionál Timor Leste (PNTL).
(gui)
