CEBU, STLTIMORLESTE.com – Primeiru Ministru (PM), Le Minh Hung Konvida Primeiru Ministru (PM) Kay Rala Xanana Gusmão vizita trabalhu ba Vietname.
PM Xanana simu direta konvite nee durante reuniaun bilateral ho nia omologu Le Minh Hung, iha salaun enkontru Bougainvillea, Shangrilla Mactan, Cebu, Filipina, Kinta (07/05/2026).
“Hau hakarak hatoo apresiasaun no onra boot ida ba ita-boot tanba konvida ona hau hodi halao vizita ofisial ba Vietname,” hatete PM Xanana liu husi nota komunikadu Imprensa neebe STL asesu husi media GPM, Sesta (08/05/2026).
Xanana Gusmão kontente atu vizita nasaun furak nee hodi partisipa mos iha forum Futuru ASEAN ba dala-tolu nuudar orador principal, plataforma importante ida atu avansa dialogu kona-ba prioridade rejional sira neebe fahe.
Xefe Governu espera liu husi vizita nee sei reflete relasaun neebe metin no buras entre Timor-Leste no Vietname neebe harii ona iha respeitu mutuo, kooperasaun no aspirasaun neebe fahe ba paz, estabilidade no prosperidade iha ASEAN.
TL apresia tebes ho kooperasaun neebe halao ho Vietname iha area edukasaun no kapasitasaun rekursu umanu, asistensia téknika no fo bolsa estudu ba Timoroan sira.
PM Xanana konsidera kooperasaun sira nee nuudar mos fator ida iha prosesu TL nian too sai membru plenu ASEAN ba dala-11.
Adezaun TL nian ba ASEAN nuudar momentu istoriku ida ba Timor-Leste. Xanana Gusmão konsidera ida-nee reflete TL nia prosesu naruk kona-ba harii dame no harii Estadu hodi integra hamutuk iha família Sudeste Aziatiku.
ASEAN laos deit nuudar plataforma ba kooperasaun rejional, maibe mos nuudar enkuadramentu governasaun, padraun no norma sira neebe bele ajuda liu-tan pais membru sira nia instituisaun sira, diversifika ekonomia iha nivel rejional no global.
Timor-Leste komprometidu atu sai membru ASEAN neebe konstrutivu no responsável no sei apoia tomak esforsu sira harii komunidade iha rejiaun neebe kontribui ba dame, estabilidade no prosperidade.
Iha okaziaun nee PM Xanana lori Timor Leste nia naran kongratula Le Minh Hung neebe eleitu nuudar Primeiru-Ministru Republika Sosialista Vietname nian no dezeja susesu iha nia Governasaun.
Akompanha Xefe Governu durante reuniaun bilateral nee mak hanesan Vise Primeiru-Ministru, Koordenador Asuntu Ekonomiku no Ministru Turizmu no Ambiente, Francisco Kalbuadi Lay, Vise Primeiru-Ministru, Ministru Koordenador Asuntu Sosial no Ministru Dezenvolvimentu Rural no Abitasaun Komunitaria, Mariano Assanami Sabino, Ministru Negosiu Estranjeiru no Kooperasaun (MNEK), Bendito Freitas, Vise Ministra Asuntu ASEAN, Milena Rangel, Vise Ministru Komersiu, Augusto Júnior Trindade, Sekretariu Estadu Komunikasaun Sosial, Expedito Ximenes, Embaixador TL iha Filipina, Marciano Gracia da Silva no Embaixadora TL ba ASEAN, Elisia Maria da Silva.
(alb)
