DILI, STLTIMORLESTE.com – Primeiru Ministru (PM) Singapura, Lawrence Wong Shyun Tsai nia vizita mai Timor Leste (TL) simboliku boot hodi hametin liu tan kooperasaun entre TL ho Singapura.
Lia hirak nee hatoo husi Prezidente Republika Jose Ramos Horta ba jornalista iha Palasiu Prezidensia Nicolau Lobato, Bairo Pite, Kuarta (01/07/2026).
PR hatete, vizita PM Singapura mai TL nee simboliku importante tebes tanba premeira vez vizita Timor.
“Singapura ita hotu hatene rai ida riku boot profisional kompotente, buat hotu sira halo nee sira estuda klean, halo ho matenek laos ho emosaun, hau hakarak duni dezde uluk kedas Timor hetan indepedensia hau koalia ho sira hahu ho Primeiru Ministru Hsien Loong, Primeiru Ministru Goh Chok Tong, primeiru Ministru hotu hotu, Prezidente hotu hotu iha Singapura hau koalia para hametin relasaun rai rua kiik,” dehan PR Horta.
Prezidente Republika hatete, rai rua entre TL ho Singapura, nasaun Singapura kiik liu, Timor populasaun boot no Singapura nia teritoriu kiik liu Timor 15 mill, Singapura mill ital deit kilometru kuadradu maibe Singapura nasaun ida riku tebes iha mundu.
“Entaun oinsa hametin liu tan relasaun teknika kapasitasaun ba Timor sira oferese ona, no iha ona kategoria haat trabalhador ke sira prontu simu husi Timor nee pertense ba Governu nia kompetensia liu husi SEFOPE negosiasaun halo ona ho Singapura para iha tempu ruma Timor oan bele ba servisu iha Singapura nee diak, hau sempre defende Timor oan servisu iha liur,” dehan PR Horta.
Prezidente Republika hatete, nia sempre defende Timor oan neebe buka servisu iha liur hodi sustenta familia iha Timor, maibe iha rai liur iha rai neebe iha seguransa, hanesan iha Australia diak tebes, Korea do Sul diak, Japaun diak, Singapura diak.
Xefe Estadu hatete, laos hanesan balun hatete ba fali ema nia atan nee lae, nee laos ema nia atan, ema esntranjeiru mos lubuk ida servisu iha Timor, Timor bele kiak maibe ema rihun ba rihun husi Indonezia, Filipina, Banladesh, Vietname, servisu iha Timor, sira buka moris iha Timor, sira la servisu iha Governu maibe sira mak kria rasik servisu loke bisnis no Timor oan barak servisu ho sira iha loza sira nee.
Timor oan lubuk mos ba liur no Prezidente mak hahu ho prosesu bainhira assume kargu nuudar Ministru Negosiu Estranjeiru nee difisil tebes iha momentu neeba, Prezidente hahu koalia ho Australia, Korea do Sul hodi simu Timor oan iha momentu neeba difisil tebes.
Xefe Estadu hatete, Timor oan ba liur manan esperiensia, manan osan hodi sustenta familia, osan nee tama direita ba familia.
La kleur tan Timor asina akordu ho USAID konaba dezenvolvimentu Greater Sunrise nee sei hatama Timor oan rihun ba rihun husi non skil too skil, Japaun rekruta daudaun ona Timor oan lubuk ida enjeneiru oin oin husi UNTL hetan treinu iha Japaun no Timor para servisu fabrika Roo Ahi iha Laleia nee.
Xefe estadu hatete, tinan ida ka rua tan servisu sei barak tebes no trabalhador mak sei la too, entaun Timor oan neebe iha Korea no Australia tenke fila mai servisu iha rai laran.
Iha biban nee Prezidente Republika hatete, Primeiru Ministru Singapura mos sei hetan kondekorasaun ho grande kolar. Hanesan mos ho Primeiru Ministru no Prezidente Republika seluk neebe vizita Timor Leste.
Xefe Estadu hatete, ho vizita PM Singapura sei aumenta kooperasaun iha area oin no sei aumenta liu tan tekniku profisional ba joven sira, programa nee hahu ona sira hili ona kooperasaun entre Prezidente Republika MNEK no MNEK Singapura no selesiona Timor oan balun ba halo kursu iha Singapura, Filipina fila mai kontinua ho online no fo mos bolsu estudu ba Timor oan ba iha singapura.
(eme)
