DILI, STLTIMORLESTE.com – Primeiru Ministru (PM), Kay Rala Xanana Gusmão abertura Workshop Preparasaun ba Konferénsia Nasionál Feto Emprezária no Empreendedora.
Workshop ne’e organiza hodi prepara delegasaun feto emprezária no empreendedora hosi munisípiu 13, inklui Atauru, atu asegura sira-nia partisipasaun másimu no ativu iha Konferénsia Nasionál Feto Emprezária no Empreendedora, ne’ebé sei realiza iha loron 22 no 23 fulan Outubru 2026.
Iha workshop ne’e, delegasaun munisipál sira halo análize no diskusaun kona-ba perfil munisípiu ida-idak, bazeia ba relatóriu estatístiku Associação Empresarial das Mulheres de Timor-Leste (AEMTL). Diskusaun mos foka ba prioridade estratéjiku lima hosi konferénsia, inklui tradús prioridade sira ba planu asaun munisipál konkretu, ho atividade, responsavel, prazu no indikadór.
Aleinde ne’e, delegasaun sira identifika oportunidade kolaborasaun intermunisipál, inklui koordenasaun produtu estratéjiku, hodi aumenta produtividade no hamenus dependénsia ba importasaun ai-han.
Workshop ne’e mos prepara delegasaun munisipál ida-idak atu lori intervensaun, pergunta no pitch munisipál durante loron rua konferénsia iha fulan Outubru.
Primeiru-Ministru Kay Rala Xanana Gusmão, iha diskursu abertura, iha Salaun CCD, Dili, sábadu (19/09/2026). hatete workshop ne’e la’ós atu foti desizaun diretamente, maibé atu diskute no analiza proposta sira ne’ebé aprezenta ona, hodi prepara feto emprezária sira ba futuru.
“Importante tebes tenke tau iha imi ida-idak nia ulun, no fator importante tebes iha imi feto iha konsiénsia boot, imi emprezáriu setor privadu, fator boot ida ba dezenvolvimentu ekonómiku iha ita-nia rai,” dehan PM Xanana.
Enkuantu Prezidente AEMTL, Herqui Luina Fernandes Alves, hatete workshop ne’e inisiativa hosi Primeiru-Ministru Kay Rala Xanana Gusmão, ho objetivu atu prepara feto empreendedora sira hosi munisípiu hotu.
“Reuniaun ohin reuniuan ida ne’ebé mak inisiativa mai hosi Sua Excelénsia Primeiru-Ministru. Reuniaun ida ne’e atu halo preparasaun ida ba feto empreendedora sira husi munisípiu 13 ho Atauro. Objetivu atu haree preparasaun, tanba iha loron 22-23 Outubru ita sei halo konferénsia nasionál ida ba feto emprezária ka empreendedora hotu. Agora ita iha grupu kiik ida, provavelmenti 60 pesoas hosi munisípiu hotu, atu serbisu haree preparasaun ba konferénsia ne’e,” katak nia.
Herqui Luina Fernandes Alves hatete konferénsia nasionál ne’e sei envolve aproximadamenta 350 feto emprezária no empreendedora hosi munisípiu hotu.
Nia esplika katak, rezultadu hosi konferénsia sei lori fila-fali ba munisípiu ida-idak, atu kontinua implementa atividade no aprezenta progresu iha enkontru sira tuirmai.
Prezidente AEMTL subliña katak, feto iha papel importante iha dezenvolvimentu nasaun, tanba kuaze metade hosi populasaun Timor-Leste mak feto.
Nia hatete, feto sira labele pasivu ka hein de’it kontribuisaun hosi nasaun, maibé tenke uza sira-nia potensialidade no kapasidade hodi kontribui ba dezenvolvimentu ekonómiku no sosial.
Tanba ne’e, workshop ne’e sai hanesan espasu atu identifika potensialidade hosi munisípiu ida-idak no haree oinsá feto sira bele esplora potensialidade ne’e liuhosi atividade negósiu, hodi hadi’a moris família no kontribui ba dezenvolvimentu nasaun. “Tanba ne’e papel feto nia importante tebes, tanba sira hanesan inan, hanesan kaben, rendimentu ne’ebé sira hetan sei kontribui direta ba sira-nia an no família,” katak nia.
(eme)
