MEHARA, STLTIMORLESTE.com — Governu Timor-Leste inaugura Monumentu Monsenhor Martinho da Costa Lopes iha Mehara, Munisípiu Lautém, Tersa-feira (22/09/2026), nu’udar forma apresiasaun ba kontribuisaun Igreja no família Liurai Miguel dos Santos iha luta ba independénsia Timor-Leste.
Primeiru-Ministru Kay Rala Xanana Gusmão hateten katak monumentu ne’e reprezenta memória istórika no agradesimentu ba Igreja Katólika, família Liurai Miguel dos Santos no ema sira ne’ebé kontribui ba luta ukun-rasik-an Timor-Leste.
“Ohin ita hamutuk iha ne’e hodi inaugura Monumentu Monsenhor Martinho da Costa Lopes. Momentu ne’e nu’udar agradesimentu ba kontribuisaun husi Igreja no família Liurai Miguel dos Santos, ne’ebé kontribui ba luta independénsia Timor-Leste,” dehan PM Xanana iha ninia diskursu iha Mehara.
Inaugurasaun monumentu ne’e hala’o liuhusi serimónia relijioza ne’ebé partisipa husi lideransa Igreja Katólika, Primeiru-Ministru, reprezentante Governu, forsa seguransa, militar, sosiedade sivíl no komunidade lokal.
Serimónia ne’e partisipa husi Sua Eminénsia Dom Virgílio Cardeal do Carmo da Silva, SDB, Bispo Metropolitanu Dioseze Dili; Bispo Dioseze Baucau, Dom Leandro Maria Alves; no reprezentante husi Dioseze Maliana.
PM Xanana, ne’ebé mós Komandante-em-Xefe FALINTIL, partisipa iha eventu hamutuk ho povu Lautém no reprezentante sira husi instituisaun públika no sosiedade sivíl.
Entre membru Governu ne’ebé marka prezensa iha serimónia ne’e inklui Ministru Asuntu Sosiál no Ministru Dezenvolvimentu Komunitáriu no Organizasaun Urbana, Mariano Assanami Sabino, hamutuk ho sekretáriu-estadu sira no reprezentante instituisaun relevante.
Monumentu Monsenhor Martinho da Costa Lopes agora sai nu’udar ida husi fatin memória iha Mehara ne’ebé rai istória kona-ba kontribuisaun Igreja, lideransa tradisionál no komunidade iha prosesu luta ba independénsia Timor-Leste.
(jos)
