DILI, STLTIMORLESTE.com – Primeiru Ministru (PM), Kayrala Xanana Gusmão vizita urjente iha Diresaun Investigasaun Kriminal (DSIK), iha kuartel Jeral Polisia Nasional Timor Leste (PNTL) hodi kongratula no hatoo apresizaun ba autoridade seguransa PNTL liu husi Diresaun Investigasaun Kriminal (DSIK), neebe salva osan falsu milhaun US$ 4 tama mai Timor Leste (TL).
Primeiru Ministru (PM), Kay Rala Xanana Gusmão hatoo apresiasaun nee, bainhira vizita urjente iha edifisiu Diresaun Investigasaun Kriminal (DSIK), iha kuartel Jeral PNTL Kaikoli hodi responde diretamente ba evolusaun situasaun neebe daudaun nee sai atensaun públiku, kona-ba osan falsu milhaun US$ 4 neebe ekipa DSIK halo operasaun prende iha loron 15/04, tuku 10:00 dader, iha armajen loja xineza ida neebe lokaliza iha Aldeia Sagrada Família, Suku Bidau Santa-Ana, Postu Administrativu Cristo Rei, Munisípiu Dili.
Entretantu PNTL-DSIK halo operasaun prende osan falsu US$ 4 nee, hafoin loja balun iha area Komoro, Kampun Baru, Supermerkadu ida iha Farol sai vitima ba osan falsu tahan US$ 100.00, nunee ekipa DSIK deside halo operasaun buka tuir kedas halo apreensaun hodi evita komunidade sira seluk labele sai vitima.
Iha vizita urjente, Primeiru Ministru (PM) Kayrala Xanana Gusmão simu direita husi Segundu Komandante Jerál PNTL, Komisaria Assistente Polisia Natercia Eufrasia Soares, Komandante Komando Operasaun Komisariu Assistente Polisia Armando Monteiro, Ispetor Jerál PNTL, Komisariu Assistente Polisia Hermenegildo Gonçalves da Cruz, Diretor DSIK, Superintendente Xefe Polisia João Belo dos Reis ho ofisiais superior PNTL no membru polisia iha edifisiu Diresaun Investigasaun Kriminal (DSIK), iha kuartel Jeral PNTL Kaikoli.
(jen)
