DILI, STLTIMORLESTE.com – Primeiru Ministru (PM), Kay Rala Xanana Gusmão iha loron Kuarta feira (17/06) too ona iha Russia atu partisipa iha Summit ASEAN–Rusia 2026 neebe sei realiza iha Kazan, hahu husi 17 too 19 Junhu 2026.
Primeiru Ministru ho delegasaun ho aviaun Turkish Airlines ho marka TK 0429 too Aeroportu Internasional Kazan iha tuku 07:15 no simu direita husi reprezentante Governu Rusia.
Durante vizita loron tolu iha Kazan, Rusia, iha loron dahuluk PM Xanana sei hamutuk ho lider sira husi nasaun membru Association of Southeast Asian Nations no Prezidente Vladimir Putin atu diskute relasaun no kooperasaun entre ASEAN no Rusia.
Iha enkontru nee, lider sira sei aborda asuntu importante sira hanesan seguransa rejional no global, investimentu no komersiu, enerjia, edukasaun, teknolojia, saude publika, konektividade, infraestrutura no troka kultura,
Summit ASEAN–Rusia konsidera nuudar plataforma importante atu hametin amizade, dialogu polítiku no kooperasaun ekonomika entre rejiaun Sudeste Azia no Rusia.
Objetivu prinsipal husi summit nee atu reforsa relasaun diplomatika entre ASEAN no Rusia, promove kresimentu ekonomiku hamutuk no kontribui ba manutensaun paz no estabilidade iha rejiaun.
Ba Timor Leste, ASEAN kontinua sai plataforma estratejika atu hasae ekonomia, dezenvolve kapasidade nasional, hametin relasaun internasional no asegura dezenvolvimentu sustentavel. Maski Timor Leste kontinua integra-an iha atividade no diskusaun rejional sira ASEAN nian hanesan parte husi prosesu adezaun totál.
Durante summit nee, sei realiza mos sesaun painel no meza-redonda sira neebe diskute parseria entre ASEAN no Eurasian Economic Union, inklui kriasaun espasu komersiu no investimentu komun, kuidadu saude, kooperasaun enerjia no industria, dezenvolvimentu dijital, inteligensia artificial (AI), seguransa ai-han, no konektividade transporte no lojistika.
Integrasaun iha Eurasia sai mos tema importante iha forum nee. Prosesu nee involve esforsu nasaun sira iha Europa no Azia atu hametin kooperasaun ekonomia, polítika, seguransa no infraestrutura. Organizasaun sira hanesan Eurasian Economic Union, Shanghai Cooperation Organisation no Belt and Road Initiative konsidera nuudar ezemplu importante husi integrasaun rejional neebe promove komersiu, investimentu, konektividade no estabilidade.
Governu Timor Leste haree esperiensia integrasaun Eurasia nuudar referensia importante ba prosesu integrasaun rejional iha ASEAN, liu-liu atu reforsa kooperasaun ekonomika no dezenvolvimentu nasional.
(alb)
