DILI, STLTIMORLESTE.com – Primeiru Ministru (PM), Kay Rala Xanana Gusmão husu jornalista sira nafatin kapasita aan, hodi haklake lia los ba povu.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (05/06/2026).
Iha biban nee Primeiru Ministru Kay Rala Xanana Gusmão hatoo parabens ba GMN neebe selebra nia aniversariu ba dala 9 eziste iha Timor Leste, husu nafatin haklake ba povu tomak buat neebe akontese iha rai laran iha area oin oin liu liu iha area politika, ekonomika no seluk tan.
“Saida mak hau husu ba imi GMN no ba media seluk mos presiza nafatin hadia imi nia kapasidade nuudar jornalista nee laos kritika imi hatun imi lae, maibe buat nee presiza hadia imi hotu para kuandu mosu buat ruma imi analiza tiha mak foin husu lae mosu buat ida mai husu, husu nee hanesan fali sosial media nee labele, nee duni imi GMN nomos ba imi idak idak kada media tenke iha diresaun tenke deskute malu hadia nafatin,” katak PM.
Primeiru Ministru hatete, antes publika notisia ruma iha media presiza buka hatene nia kauza ba nasaun iha kalae? Ida nee mak funsaun media nia.
“Media laos dehan katak media diak deit diak ba Governu lae mais kuandu atu kritika atu tau problema ruma tenke hatene didiak kauza, no buat sira nee hotu mak foin tau ida nee mak funsaun media nia, funasaun media atu fo imformasaun neebe los, maibe laos tuir los ita idak idak nia hanoin maibe los tuir haree didiak analiza didiak ida nee diak ou lae? Ida nee sala tiha hadia tiha nunee nunee nee para povu bele fiar, nunee imi fo imformasaun povu dehan los duni povu sei fiar, kuandu imi esplika Timor nee lao nusa ona lao ba neebe ona povu dehan los duni tanba fiar,” dehan PM Xanana.
Iha biban nee PM Xanana husu jornalista sira servisu ho laran tomak ba povu ba demokrasia, liu husi notisia neebe mak rekoila nunee povu tau fiar nafatin ba madia.
“Aproveita ida nee mos nuudar eis jornalista imi hotu hatene katak hau naran Xanana nee naran jornalista nia, funu nia kay Rala, Jornalista nia Xanana, nuudar eis Jornalista hau ejiji ba imi hadia, laos atu taka imi nia ibun kuandu Governu halo sala labele taka, maibe saida mak los tau no saida mak sala tau mais haree tuir kedas ona vaze ba problema ida nee ida nee mak hau husu ba imi,” hakotu PM Xanana.
(eme)
