DILI, STLTIMORLESTE.com – Primeiru Ministru (PM), Kay Rala Xanana Gusmão informa ba Prezidente Republika Jose Ramos Horta katak, iha tinan 2027 sei laiha tan rekrutamentu foun ba funsionariu.
Bainhira remata hasoru malu, Primeiru Ministru Kay Rala Xanana Gusmão ba jornalista sira iha Palasiu Prezidensial Nicolau Lobato, Bairo Pite, Kinta (06/08/2026) hatete, ohin mai enkontru ho Prezidente Republika hanesan enkontru semanal hodi informa atividade neebe Governu halo ba Xefe Estadu.
Iha biban nee Primeiru Ministru hatete, mai imforma ba Prezidente Republika katak, iha tinan 2027 Governu sei laiha rekrutamentu ba funsionariu foun.
“Enkontru semanal hau mai hodi informa ba Prezidente Republika katak, ami hasai rezolusaun ida ba tinan 2027 laiha tan rekrutamentu foun ba funsionariu sira. Nee tanba ita atu kurije, hadia buat sira hotu, primeiru ita hadia tiha lai depois mak ita haree fali. Tanba iha dividas barak tebe-tebes, senora nee grau ida nee, lo-loos nee nia atu sai ona, nia seidauk sai, buat sira nee hotu neebe iha hela dividas. Senora ida nee atu ba reforma, neebe hadia tiha sira nee hotu, tinan 2027 sei laiha lai, depois mak haree fali, nee mak hau mai informa ba Prezidente Republika,” dehan Primeiru Ministru Xanana.
Iha biban nee Primeiru Ministru mos informa ba Prezidente katak, informa konaba nia viajen ba Darwin. Aleinde nee Prezidente Republika mos informa ba Primeiru Ministru konaba nia vizita ba Vanuatu.
“Nia dehan Primeiru Ministru Vanutua, Papua Nova-Gine sei mai iha 28 Novembru tinan 2026. Vizita ofisial, primeira vez mak husi pasífiku sira mai iha ita, hodi simu sira ho diak. Prezidente Republika fo hela atu Konselhu Ministru deside iha Papua Nova-Gine sei iha eleisaun nee mak sira husu Timor bele haruka ema balun ba hodi fo seguransa ba eleisaun,” katak PM Xanana.
Iha biban nee Primeiru Ministru, Kay Rala Xanana hatete, iha semana kotuk mos Governu hasai rezolusaun ida atu fo subsidiu ba orgaun komunikasaun sosial.
Aleinde nee informa mos ba Prezidente Republika katak, iha loron 20 Agostu selebrasaun nee halao hela.
Iha biban nee PM Xanana mos dehan, Ministru Defeza iha fulan Julhu ba Portugal asina memorandu of understanding ho Governu Português ho Ministru Defeza Portugal nian atu apoiu ba F-FDTL.
“Atu informa deit katak, Ministra Edukasaun nee merenda eskolar laiha. Maibe ita nia estudante sira bainhira ba iha liur mak iha kompetisaun iha ASEAN laran mai lori mak emas. Neebe Prezidente Republika dehan, agora atu haree took, oras tan loke expo, neebe hau sei ba Ministeriu Finansas. Atu haree problema balun, hau dehan ona ba Prezidente Republika, hahu iha 18 hau iha deit, loro-loron iha Minsiteriu Finansas koa imi nia osan nunee ita bele lao ho diak,” hakotu.
Foin lalais Reuniaun Konselhu Ministru iha Palasiu Governu aprova proposta Rezolusaun Governu, neebe aprezenta husi Prezidente Komisaun Funsaun Publika, Agostinho Letêncio de Deus, hodi suspende rekrutamentu ba funsionariu publiku, ajente administrasaun publika, kontratasaun termu sertu ba kazual sira. Intensaun husi proposta Rezolusaun Governu ida-nee atu limita kreximentu kontínua husi administrasaun publika, neebe halao lahu prosesu selesaun neebe rigorozu no bazeia ba nesesidade real, neebe kauza aumentu ida neebe boot iha despeza orsamental.
Rezolusaun Governu neebe propoin nee salvaguarda exesaun sira neebe relasiona ho kontratasaun ba Gabinete Ministeriál sira, prosesu selesaun bazeia ba meritu ba kargu diresaun no xefia nian.
(eme)
