DILI, STLTIMORLESTE.com – Primeiru Ministru (PM), Kay Rala Xanana Gusmão hatoo kongratula ba Prezidente Republika (PR), Jose Ramos Horta, tanba hatoo diskursu kapaas iha eventu dialogu Shangri-La ba dala 23 iha Singapura.
Primeiru Ministru, Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (05/06/2026).
“Prezidente mos horiseik mak mai, hau kongratula Prezidente tanba Shangri-la iha Singapura nia halo diskursu ida kapaas tebes, nomos nia informa katak depois nia liu husi Jakarta kontaktu nia iha neeba mos koalia tan iha neeba, hau agradese ohin partisipa mos iha dia nasional tasi nia mai informa ba nia katak halao iha munisipiu hotu-hotu no iha Dili mos too iha Domingu,” dehan Primeiru Ministru Xanana.
Iha biban nee Primeiru Ministru mos informa ba Prezidente Republika kona-ba Feira loron nasional tasi iha atividade eskola kafee mos aprezenta atividade oin oin husi labarik sira.
Eskola kafee mos aprezenta labarik sira halo ho plastiku ho surat papilaun, papel, halo arte ho idea konaba protesaun oseanu tasi iha Futuru buat sira nee hotu kapaas tebes tanba nee Primeiru Ministru konvida parte hotu ba haree hodi kumpre didiak.
“Hau mos informa ba Prezidente katak orsamentu retifikativu aprovadu tiha, nia dehan katak parese sira haruka ona mai nomos dehan iha konsellu Ministru ami koalia Marsu-Julhu, Ministeriu sira tenke komesa ona halo Sistema foun ida atu haree didiak bainhira idak idak aprezenta nia orsamentu,” dehan PM Xanana.
Prezidente Republika Jose Ramos Horta fahe prosesu pas no dezenvolvimentu Timor Leste nia iha eventu dialogu Shangri-La ba dala 23 iha Singapura.
Prezidente Republika bainhira remata partisipa dialogu Shangri-la kontinua viajen ba Indonezia- Jakarta halo komferensia ida eskola ERIA School of Government halo intervensaun besik oras tolu nia laran koalia konaba istoria Timor nia.
Durante iha singapura Prezidente Republika Jose Ramos Horta halao enkontru ho Prezidente Republika Vietname To Lam hodi deskute hamutuk oinsa hametin bilateral rai rua. Enkontru nivel aas nee foka liu ba aprofunda ligasaun istorika entre nasaun rua nee no esplora dalan foun ba kolaborasaun diplomatika no ekonomika no seluk tan.
(eme)
