LAUTÉM, STLTIMORLESTE.com — Primeiru-Ministru (PM) Kay Rala Xanana Gusmão nu’udár Komandante-Em-Xefe FALINTIL-FDTL, ohin vizita Suku Mehara, Postu Administrativu Tutuala, Munisípiu Lautém, hodi observa diretamente fatin preparasaun bá Serimónia Inaugurasaun Monumentu Monseñor Martinho da Costa Lopes.
Iha vizita ne’e, PM Xanana observa kondisaun no prontidaun fatin ne’ebé sei uza bá serimónia inaugurasaun monumentu, ne’ebé sei hala’o iha loron Tersa, 22 Setembru 2026.
Vizita ne’e nu’udár parte hosi preparasaun no verifikasaun direta hodi asegura katak, fatin no aspetu sira hotu ne’ebé presiza bá serimónia prontu ona no bele hala’o tuir programa ne’ebé planeadu.
Serimónia Inaugurasaun Monumentu Monseñor Martinho da Costa Lopes sei marka ho atividade ofisiál iha Suku Mehara, nu’udár forma ida hodi prezerva memória no kontribuisaun Monseñor Martinho da Costa Lopes bá povu no istória Timor-Leste.
Tuir ajenda neebe STL Asesu husi komisaun organizadora iha Lospalos, Domingu lokraik (20/09/2026) katak, IX Governu Konstitusionál sei inaugura Monumentu Mehara iha Lospalos, Lautém, Tersa-feira (22/09/2026), nu’udar memória ba Monsenhor Martinho da Costa Lopes.
Serimónia inaugurasaun sei hala’o iha Mehara, hahú tuku 14:00, ho prezensa konvidadu sira no Primeiru-Ministru Kay Rala Xanana Gusmão.
Tuir ajenda, Xanana Gusmão, iha kualidade nu’udar Komandante-em-Xefe FALINTIL, sei prezide serimónia no sei loke placa inaugurasaun monumentu iha tuku 15:30.
Depois, tuku 15:40, Bispu Diocese Baucau, D. Leandro Maria Alves, sei prezide Litúrjia Liafuan, tuir mai ho bensaun ba Monumentu Mehara iha tuku 16:50.
Serimónia sei remata tuku 17:00, antes Primeiru-Ministru no delegasaun sira fila husi Mehara ba Dili tuku 17:30.
Monumentu ne’e dedika ba memória Monsenhor Martinho da Costa Lopes, Administradór Apostóliku Dili durante períodu 1977–1983. Tuir karta konvite, inaugurasaun ne’e konsidera nu’udar homenagem ba nia eransa, korajen no sakrifísiu.
Atividade kona-ba inaugurasaun hahú ona Domingu (20/09/2026), ho viajen ekipa husi Dili ba Lospalos no kobertura memória kona-ba akontesimentu iha Mehara, 22 Setembru 1982.
Segunda-feira, ekipa sei kontinua kobertura memória kona-ba akontesimentu refere, antes serimónia inaugurasaun iha Tersa-feira.
Depois serimónia, ekipa organizadora sei hala’o desmontajen no desmobilizasaun ekipamentu, enkuantu atividade limpeza geral iha área serimónia sei responsabiliza hosi ekipa SMASA Munisípiu Lautém.
(jos)
