DILI, STLTIMORLESTE.com – Primeiru Ministru (PM), Kay Rala Xanana Gusmão relata servisu neebe Governu halo daudaun ona no balun neebe seidauk halo ba Prezidente Republika Jose Ramos Horta.
Bainhira remata hasoru malu, Primeiru Ministru Kay Rala Xanana Gusmão ba jornalista iha Palasiu Prezidensial Nicolau Lobato, Bairo Pite, Kinta (16/07/2026) hatete, ohin mai halo enkontru ho Prezidente Republika hodi aktualiza atividade neebe Governu halo ba Xefe Estadu.
“Hau mai imforma ba Prezidente katak ikus nee imi hotu akompanha ami iha atividade lubuk ida ho ministeriu, diretores, ho instituisaun hotu temi karik atu obriga too iha Diretor sira bainhira halo orsamentu tenke hanoin ida ho vizaun ida klara ba Futuru, lae ita halo deit, halo deit buat nee lalao ba oin,” dehan Primeiru Ministru.
Primeiru Ministru hatete, iha 2024 sira husu ba kompanha ida hodi buka haree 2012-2030 nee lao too iha neebe ona tanba iha 2000 PM lao too iha ASEAN neeba Governante iha ASEAN dehan ba PM Xanana katak Timor ukun aan, bainhira ukun aan tenke iha vizaun ida longu Prazu nia, lae partidu ida sae manan osan tun fali partidu ida sae manan osan tun fali maibe povu sei lasente moris diak.
Tanba nee mak sira halo tiha Planu dezenvolvimentu Nasional (PDN) maibe ida nee balun vota kontra tanba nee husu atu halo avaliasaun ida konaba saida mak halo ona Indika imfaestrutura balun diak balun seidauk.
“Ukun aan nee laos atu hetan bandeira, hetan Ino Nasional ho estadu ida bee buka haree ba isin deit, haree ba grupu familia, ho ida nee mak ami haree katak iha 2016 iha 23% komunidade hetan eletrisidade maibe fali iha 2023 mos hanesan nafatin agora nee lao dadauk ona tinan ida nee aldeia hotu hotu sei hetan, komunidade tomak sei hetan. Problema bee, problema estrada tanba ida nee se ita temi imfraestrutura bazika nee katak baze ba dezenvolve ba buat seluk ho ida nee mak ami semana ida nee lao koalia hodi husi diretores rasik mos bele hanoin katak kuandu atu halo orsamentu tenke halo buat ida neebe ninia rejultadu nee fo oportunidade ba futuru halo nusa,” dehan PM Xanana.
Primeiru Ministru mos informa ba Prezidente Republika katak, Governu la halo buat barak, no informa mos ba Prezidente katak Governu haruka ona ba parlamentu Nasional konaba estratejika ida orsamentu ba 2027.
“Orsamentu 2027 iha fulan Agostu tenke hatama ona hotu hotu tenke konsidera laos husu deit husu deit, ida mak halao hela mos, maibe tenke konsidera mos katak agora nee laos KRO ona mais husi KRO (Komisaun Revizaun Orsamentu) bolu atensaun ba iha prioridade politika Governu nia iha 2027-2028,” katak PM.
Iha tinan 2028 iha eleisaun foun Governu nee lahalo buat ida, Governu seluk mai atu lori rai nee semo lalais ba mundu diak.
(eme)
