DILI, STLTIMORLESTE.com – Primeiru Ministru (PM), Kay Rala Xanana Gusmão deklara, nia parte seidauk simu karta husi Deputadu Bankada Partidu CNRT nain 31 neebe husu demite Ministru Prezidensia Konselhu Ministru (MPKM), Agio Perreira.
Kestaun nee Primeiru Ministru hatete ba jornalista sira hafoin partisipa iha selebrasaun aniversariu Fidel Castro ba dala 100 iha AMRT, Kolmera, Dili, Tersa (11/08/2026).
“Hau la simu karta ruma, imi mak hatene, oee nonok, ba husu bankada, mai husu fali hau,” hatete Xefe Governu.
Xefe governu afirma, nia parte seidauk simu karta ruma, tan nee nia husu jornalista atu ba husu Deputadu Bankada Partidu CNRT.
Molok nee Bankada Partidu Kongresu Nasional Rekonstrusaun Timor (CNRT) iha Parlamentu Nasional husu Primeiru Ministru Kay Rala Xanana Gusmão atu demite Ministru Prezidensia Konselhu Ministru (MPKM), Agio Pereira.
Xefe Bankada CNRT, Deputadu Patrocínio Fernandes hatete, rekomendasaun ida nee bazeia ba karta ida neebe iha tinan 2025 asina husi Deputadu CNRT nain 31 no estrutura partidu iha nivel nasional no munisipiu. Karta refere aprezenta ba Prezidente Partidu CNRT, Kay Rala Xanana Gusmão, no Sekretariu Jeral Partidu, Francisco Kalbuadi Lay, atu konsidera demisaun Agio Pereira husi kargu ministru.
Tuir Patrocínio Fernandes, motivu husi rekomendasaun nee mak tanba Agio Pereira publika artigu balun neebe tuir sira nia haree bele dezakredita Governu no Estadu, no fo impaktu negativu ba estabilidade governativa.
“Ami abertamente hatoo ami nia hanoin ba Primeiru Ministru hanesan Prezidente Partidu CNRT, karik asaun ida nee konsidera grave no ameasa estabilidade governativa, ami hanoin katak Primeiru Ministru iha kompetensia atu demite nia husi membru Governu,” hatete Patrocinio Fernandes ba jornalista sira iha Parlamentu Nasional, Kinta feira (30/07/2026).
(alb)
