PORTUGAL, STLTIMORLESTE.com – Primeiru Ministru (PM) Kay Rala Xanana Gusmão hamutuk ho personalidade 14 seluk, simu Prémiu Karreira iha VIII edisaun Prémiu Lusofonia tinan 2024, neebé organiza husi parseria Comunidade dos Países de Língua Portuguesa (CPLP) no Câmara Municipal Cascais.
Premiu Karreira nee entrega direta husi Sekretáriu Ezekutivu CPLP, Zacarias Albano da Costa ho Mentora Gala Prémiu Losofonia, Isabel Leitão iha salaun Preto e Prata, Casino Estoril, Lisboa, Sabadu (12/10/2024).
Primeiru Ministru Xanana Gusmão espresa sentimentu nakonu ho emosaun, tanba bele integra iha lista boot hamutuk ho personalidade sira galardoadas, dezde kriasaun prémiu nee iha tinan 2017.
Maski nunee, Xanana Gusmão konsidera prémiu ida nain lo-loos mak povu Timor Leste, tanba povu Timor Leste mak luta bá integridade nasaun nian, sakrifika aan bá libertasaun povu ho nia territóriu.
Xanana deklara katak, nia papél mak lidera luta libertasaun no independénsia nee, maibé tuir lo-loos nee povu mak lidera nia.
“Feto, mane, jerasaun foun no labarik sira iha hau nia nasaun mak inspira hau, sira mak fó forsa no esperansa bá hau. Sira nunka husik hau rende iha momentu sira difísil durante hau viajen, sira mak halo hau onradu iha loron ohin”, hatete PM Xanana Gusmão, neebe haktuir iha Komunikadu STL asesu, Tersa nee (15/10/2024).
Buat neebé akontese iha era independénsia, nee ekontese mós iha tinan 22 ikus iha momentu ida neebé nasaun ne’e dezenvolve aan sai husi rai rahun.
La ho povu Timor ninia reziliénsia no barani, Xanana hatutan, nunka bele sai nasaun ida neebe mak ko’alia Lian Português neebé nuudar orgulhu ida, hanesan nasaun demokrátiku, dinámiku no pás iha prosesu viajen bá progresu.
Nia hatutan, se deit mak la kompriende valór husi komunidade neebé koalia lian Português, la kompriende mós sentidu husi amizade no solidariedade sem dezprovida konveniénsia.
“Universu Lían Portugés SEI Lusofonia iha dimensaun mehi no mehi boot liu hotu-hotu neebé sei la hotu, nuudar epígrafe iha Gala ida, no hau fiar”, katak Xanana.
Mehi Lusofonia ida, hatuur relasaun klean liu husi halibur ema hotu-hotu iha Lian no kultura, hanesan mós mehi ida bá liberdade ema Timor nian, hamutuk muda mehi nee sai realidade.
Valór sira amizade nian no defeza bá injustisa neebé mak mundu tomak kestiona, espesialmente iha nasaun sira mak koalia lian Português, ida nee duni mak ajuda tebes TL nia viajen hodi mai too iha momentu eventu ida nee.
Valor sira neebe oras nee daudaun povu Timor komunga, sai hanesan valór neebé sei kontinua kuda metin bá jerasaun foun sira.
Valór sira neebé seidauk implementa no ema haluha ona iha mundu, ida nee mak tenke luta atu kontinua defende.
“Tanba nee, ita tenke utiliza Lian Português hanesan ita nia identidade komún atu haklaken mensajen dame nian no bele bolu atensaun bá mundu tomak”, tenik nia.
Aproveita oprtunidade ida nee bainhira Sekretáriu Jerál Organizasaun Nasaun Unidas ho nia nasionalidade Portuguesa no oras nee hanesan mós sidadaun Timor, lidera komunidade internasionál neebé enfrenta hela inserteza, dezafiu no nakonu ho ameasa oin-oin, valór sira Lusofonia importante liu iha tempu ohin loron nian.
Xanana hein katak legadu fundamentál neebé komunidade nee husik hela kultura, valór sira, lingua no fiar, bele halo ema hotu-hotu halibur malu bá objetivu justa.
Aproveita oportunidade ida nee Xanana mós anunsia katak, iha fulan Junhu 2025, Timor Leste sei sai hanesan uma nain bá 4.ª edisaun Konferénsia Komunidade Luso Aziátika.
Ida nee laós deit tanba Timor Leste hanesan nasaun membru bá CPLP neebé hatuur aan iha Oriente, maibé mós tanba TL konsidera importnate tebes atu respeita komunidade luso aziátika, desendente husi antigu mariñeiru no antigu soldadu Portugés hanesan aventurada atu deskobre rejiaun nee no konsege sobrevive minoria too ohin loron hanesan iha nasaun Sri Lanka, Malázia, Mianmar, Tailândia, Xina, Vietname no Indonézia, husi Ambon too Flores no Jakarta too Aceh!
Ikus liu, Xanana hakarak agradese bá parte administrasaun Gala Prémiu Lusofonia, kona-ba preve ne volénsia bá eskolha privilejiadu nee liu-liu bá Isabel Leitão (Mentora), Bá Dr. Mário Máximo, Bá Embaixadór Lauro Moreira, Bá Deputadu Paulo Pisco, Ba Dr. Hélder de Oliveira, Bá Dr. Tony Tcheka, Bá Dra. Raquel Flores no bá Gabriel Niva, aprezentadór sira iha Gala, bá parseiru sira Gala nian, CPLP no Munisípiu Cascais, neebé eleva prinsípiu sira lusofonia, bá amigu José Cid, padriñu Gala Lusofonia nian, vítima feto timorense mana Gabriela Carrascalão.
Prémiu neebé atribui hamutuk ho PM Xanana mak hanesan, prémiu múzika mundu simu hosi Ana Moura, prémiu méritu lusófonu simu husi Manuel Nsua, prémiu Dansariña simu husi Cris Aysel, prémiu ambiente simu husi Josefa Sacko, prémiu teatru no sinema simu hosi Filipe La Féria, prémiu espesiál Lusofonia simu hosi Filomeno Gonçalves, prémiu artista Komunikasaun Sosiál simu husi Liliana Campos, prémiu Sidadania simu hosi Miguel Duarte, prémiu asaun emprezariál, prémiu espesiál Lusofonia simu hosi Luísa Diogo, prémiu méritu simu hosi António Quintas, prémiu moda estilizmu simu husi Ana Sousa, prémiu literatura simu husi Abdulai Sila, prémiu diplomasia lusófona simu husi Fátima Jardim, no prémiu língua portugeza simu husi Edmilson Caminha.
Akompaña PM Xanana simu prémiu ne’e mak Visi Primeiru Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Ministru Interiór, Francisco da Costa Guterres, Ministra Edukasaun, Dulce de Jesus Soares, Ministru Justisa, Sérgio de Jesus Fernandes da Costa Hornai, Ministru Ensinu Superiór, Siénsia no Kultura, José Honório da Costa Pereira Jerónimo, Sekretáriu Estadu Komunikasaun Sosiál, Expedito Dias Ximenes, Prezidente Câmara Comércio no Indústria Timor-Leste (CCI-TL), Jorge Serrano, Embaixadora TL iha Portugal, Isabel Guterres, Embaixadora TL bá CPLP, Laura Abrantes, no estudante Timoroan sira iha Portugal.
(eme)
