DILI, STLTIMORLESTE.com – Primeiru Ministru (PM), Kay Rala Xanana Gusmão tun direta iha terenu hodi observa operasaun husi Polisia Sientifiku Investigasaun Kriminal (PCIC) ba atividades scam call center iha area City 8 iha Suku Manleuana, Munisipiu Dili.
Iha City 8 Manleuana, PM Xanana halo observa diretamente ba atividades operasaun neebe halao husi PCIC, iha prosesu buska no aprensaun ba sidadaun xineza nain 24 neebe deskonfia involve iha atividade scam call center nee.
PCIC halao operasaun nee hanesan parte ida husi esforsu autoridade sira iha Timor Leste (TL) atu kombate krime transnasional no atividade ilegal sira neebe bele ameasa seguransa no estabilidade nasaun ida nee.
Xefe Governu bainhira halo observasaun nee iha Manleuana, akompanha husi servisu autoridade sira no haree prosesu investigasaun no aprensaun neebe PCIC halao iha fatin refere.
Autoridade sira atualiza katak, investigasaun sei kontinua atu apura faktu sira no hatene klaru liu tan kona ba involvimentu ema sira neebe kaer ona iha kazu nee.
Obserbasaun PM Xanana ba Atividade Operasaun Scam Call Center husi PCIC iha Manleuana nee akopanha husi Diretor nasional PCIC, Vicente Fernandes Brito, Diretor SNI no ekipa Investigasaun sira husi Polisia Nasional Timor Leste (PNTL).
(jos)
