DILI, STLTIMORLESTE.com – Membru Parlamentu Nasional (PN) husu Autoridade Inspesaun no Fiskalizasaun Atividade Ekonomia, Sanitaria Alimentar (AIFAESA) atu kontrola ai-haan neebe kompanhia sira fornese ba pasiente sira iha Hospital Nasional Guido Valadares (HNGV) no ba membru FALINTIL Forsa Defeza Timor Leste (F-FDTL).
“AIFAESA agora daudaun nee halo servisu ida neebe diak tebes, maibe ami sujere mos ba AIFAESA atu ba kontrola hahan Catering neebe kompnahia sira fornese ba Instituisaun Estadu sira hanesan ba F-FDTL no HNGV,” dehan Deputada Lidia Norberta iha Parlamentu Nasional, Kuarta (04/12/2024).
Deputada Lidia hatutan, AIFAESA presiza halo kontrola ba ai-haan sira neebe kompanhia sira fornese ba HNGV no F-FDTL, tanba kada tinan Parlamentu Nasional aprova osan nee atu hola hahan sira nutritivu laos hola fali hahan importadu sira nee.
“Kada tinan ita aprova osan hodi tau ba instituisaun sira nee hodi garante katak militar no pasiente sira iha HNGV bele hetan hahan ida neebe nutrtitivu, nunee bele fo saude neebe diak ba sira, maibe akontese mak kontrolu neebe la iha ladun diak, entaun kompanhia iha liras neebe mak naruk tebes hodi konitnua fornese hahan sira neebe mak importadu sira,” hatete Deputada nee.
(alb)
