DILI, STLTIMORLESTE.com – Deputadu sira iha uma fukun Parlamentu Nasional (PN) sei obriga Prezidente Republika Jose Ramos Horta atu promulga Lei Kodigu Penal (KP) konaba kriminalizasaun defamasaun no injuria. Hatan ba kestaun nee Prezidente Republika (PR) husu Governu, PN, diak liu foka ba preparasaun Simeira ASEAN iha 2029.
Prezidente Republika Jose Ramos Horta hatoo kestaun nee ba jornalista sira iha Aeroportu Internasional Nicolau Lobato, Komoro, Kuarta (17/06/2026).
PR hatete, diak liu Governu no Parlamentu Nasional foka ba preparasaun Simeira ASEAN 2029.
“Hau hatete deit diak liu Governu, Parlamentu, Prezidensia ita foka ba krize mundial para hakmaan terus povu nia, laos halo fali lei konaba defamasaun nee ho fali kodigo penal nee husik lai ba nee laos prioridade ida, ita konsentra liu ba buat neebe prioridade. Hau hatete ema balun preokupadu los ba atrasu iha Timor Leste konaba infraestrutura ba Simeira ASEAN nian 2029, sira husu lisensa ba hotel sira be uza nee halo ona ka lae? tanba Governu mak husu ba sira halo hotel 5 estrela lalais, ida la sufisiente maibe too agora lisensa oan ida mos susar tebes, buat neebe iha rai seluk Governu halo desizaun ohin nee ohin kedas tanba ita mak hakarak ita mak presiza, iha nee dada too agora,” dehan Prezidente Republika Jose Ramos Horta.
Prezidente Republika hatete, kona-ba konstrusaun Aeroportu Internasional Nicolau Lobato too agora seidauk book, lo-loos nee avansa tiha ona.
Liga ho konstrusaun Aeroportu Internasional Nicolau Lobato, Sekretariu Estadu Komunikasaun Sosial (SEKOMS), Expedito Dias Ximenes hatan ba Prezidente Republika katak daudaun nee iha ona prosesu nia laran. “Ida nee iha ona prosesu nia laran,” dehan Sekretariu Estadu.
Hatan ba ida nee Prezidente Republika hatete, klaru katak iha ona prosesu nia laran maibe nunka haree ema halo servisu, difisil tebes atu halo Aeroportu nee prontu ba 2029. “Tanba sa infraestrutura boot los tenke prontu sein minimu fulan 6 antes para halo teste, teste oin oin teste aviaun sira nia bainhira tun, sae, teste imigrasaun, teste alfandega teste kuarentena, saude nia, buat oin oin,” dehan PR Horta.
Prezidente Republika hatete, nia akompanha Aeroportu lubuk ida, Kuala Lumpur, Bangkok fulan hira nia laran runrangan los, tanba nee buat sira nee presiza teste nunee haree failha iha neebe ajusta.
Nomos hotel sira mos hanesan laos ohin prontu aban ema tama tenke iha garantia ema halo, no rekruta trabalhador sira, trabalhador husi kiik nia too espesializado nia, ekipamentu, dekorasaun hotel sira nee laos imfraestrutura fizika prontu ohin, ohin kedas ema tama lae, maibe fulan balun tan treinu ema liu husi rekrutamentu.
Oinsa Prezidente nia hanoin husi Deputadu sira iha Parlamentu Nasional obriga lei kriminalizasaun defamasaun oinsa ho Prezidente sei promulga ka lae? hatan ba kestaun nee Prezidente hatete, nia fiar sei hetan konsensus ida ho Governu no Parlamentu Nasional.
“Hau fiar sei hetan konsensus husi Governu no Parlamentu Nasional para hein lai too liu tiha 2028 no 2029 mak haree ida nee ita konsentra lolos ba establidade politika, konsentra ba simeira Timor Leste simu ASEAN nee buat sira nee, hau fiar sei hetan konsensus tanba iha bankada Governu nee ema diak komprensaun diak, depois KHUNTO mos ema diak deit, bele koalia ho FRETILIN, PLP, para hadia tiha lai lei konaba defamasaun nee,” dehan PR Horta.
Aleinde nee Sekretariu Estadu Komunikasaun Sosial (SEKOMS), Expedito Dias Ximenes hatete, iha lei komunikasaun sosial halo hela revizaun sei la kriminaliza produtu jornalistiku sei la kriminaliza.
Foin lalais Vise Prezidente Parlamentu Nasional, Duarte Nunes hateten, Parlamentu Nasional sei obriga Prezidente Republika (PR) Jose Ramos Horta atu promulga lei Kodigu Penal kona-ba kriminalizasaun defamasaun no injuria.
Nia hatete, prosesu lao hela, neebe ba mos Prezidente dehan la promulga ok los ona,Mas buat balun neebe Prezidente Republika lakoi mas Parlamentu Nasional bele obriga por ezemplu iha votasaun unanimidade mak ba iha neeba nafatin mak liu loron 8 Prezidente Republika tenke promulga.
(eme)
