DILI, STLTIMORLESTE.com – Membru Parlamentu Nasional (PN) preokupa ho progresu konstrusaun monumentu 12 Novembru, neebe tuir kontratu konstrusaun hahu iha loron 23 Setembru 2021 no sei konklui iha loron 22 Setembru 2022, maibe too oras nee seidauk finaliza no paradu hela.
“Ita triste tebes, tanba nee husu ba kompanhia neebe kaer obra nee, tanba nia manan ona tender maibe tanba sa mak obra nee lao lentu demais too agora seidauk hotu falhansu nee iha neebe,” hatete Deputadu Bankada CNRT, Natalino dos Santos ba jornalista sira, iha resintu PN, Segunda (04/11/2024).
Ministeriu Asuntu Kombatentes Libertasaun Nasional (MAKLN) tuir Deputadu Natalino katak, hanesan nain ba obra nee presiza tau atensaun, atu nunee bele orienta kompanhia hodi aselera projetu ida nee.
“Hakarak ka lakohi husu lai ninia responsabilidade ba kompanhia ida nee, tanba sa mak seidauk finaliza, problema nee iha neebe, no Ministeriu kompetente presiza buka tuir atu hatene,” esplika nia.
Tanba tuir nia, se obra nee kompanhia la finaliza tuir kontratu neebe iha mak tenki halo auditoria, nunee bele hatene lo-loos fukun husi neebe mak too oras nee obra nee seidauk bele finaliza.
Kompanhia la iha kapasidade atu kaer obra nee diak liu fo kompanhia seluk, nunee bele finaliza konstrusaun monumentu ba 12 Novembru nee.
(alb)
