DILI, STLTIMORLESTE.com – Osan milhaun US$ 4 neebe Polisia Nasional Timor Leste (PNTL) apreensaun iha area Bidau Masaur, Aldeia Sagrada Família, Suku Bidau Santana, Postu Administrativu Kristu Rei, Munisípiu Dili, konfirmadu katak osan falsu.
Hatete Diretor Servisu Investigasaun Kriminál Komando Jerál Polisia Nasionál Timor Leste (PNTL), Superintendente Xefe Polísia João Belo dos Reis ba jornalista sira iha Komando Jeral PNTL, Kuarta nee (15/04/2026).
Nia dehan, hafoin halo tiha buska no apreensun ba osan refere, ekipa deteta osan ho montante milhaun US$ 4 iha armajen ida iha Bidau Masaur, nunee hafoin halo buska ohin, PNTL halo kedan ezaminasun no rezulta katak osan nee falsu duni.
“Prontu ita halo ona ezaminasaun, depois de ita simu tiha relatoriu husu ita-nia populasaun neebe mak sente vila ba iha osan nee iha fulan hirak liu ba ita aprezenta kedan ba banku sentral hodi halo ezaminasun iha neeba, sira mos iha osan hanesan neebe mak sira halo komparasaun osan orijinál hatama ba makina, depois ita hatene katak nee falsu kedan iha neeba. No ohin depois de prende ita halo kedan ezaminasun no husi nee ita haree osan nee loos nee falsu”, nia deklara.
Nia esplika, osan hamutuk milhaun US$ 4 neebe Diresaun Nasionál Servisu Investigasaun Kriminál ho komunidade intelenjensia prende fali laos osan.
“Laos lavajen dinheiru, maibe nee loos duni katak osan falsu duni ka halo falsifikasaun notas,” nia deklara.
Nia dehan, daudaun osan sira nee DNSIK asegura ona iha Diresaun Servisu Investigasaun Kriminál nian.
“Ita hetan ajuda husi Ministeriu Públiku no Diresaun Servisu Investigasaun Kriminál halo hela kontajen ba osan nee, tanba nee hau seidauk bele haklean buat ruma, se kuandu ekipa halo hotu ona servisu aban ka bainhira sei relata ba ita boot sira,” nia deklara.
Nia hatutan, evidensia sira neebe polísia ohin apreende mak evidensia sira osan tahan kaixa neen inklui kaixa kiik iha balun tan.
Komadante nee informa liu tan, polísia asegura ona ema nain haat ba kazu osan falsu nee, ema nain haat nee mak hanesan nain ba armajen.
“Sira ita lori mai ona halo identifikasaun ona iha nee, depois iha seluk tan ita sei konsidera sira nee nasionalidade husi Xina,” nia koalia.
Nia esplika liu tan katak, osan falsu neebe mak molok nee PNTL liu husi Diresaun Servisu Investigasaun Kriminál halo apreensaun ho montante US$ 4000 no ohin mak milhaun US$ 4.
Nia argumenta, osan neebe molok nee polísia halo apreensaun iha Taibesi foin lalais nee no kompara osan neebe foin halo apreensaun milhaun US$ 4 osan tahan US$ 100 hanesan nee.
Nia afirma, tanba nee polísia konsidera osan sira falsu durante nee sirkula iha Timor Leste mai husi fatin neeba.
(jos)
