DILI, STLTIMORLESTE.com – Polísia Nasional Timor Leste (PNTL) detein ona suspeitu nain 12 liga ho kazu sobu festa ida iha área Akanunu, Aldeia Halidolar, Sabadu ( 09/5/2026) foin lalais tuku 05:00 OTL madrugda.
Nia dehan, suspeitu nain 12 neebe detein iha sala mak kompostu husi AS, DS, SX, ACS, MM, NNR, JB, MS, NM, AS, S P no AR.
Nia tenik, akontesimentu nee rezulta sasan lubuk, hanesan meza, kadeira, sounds sistem, espiker no seluk tan, rahun iha festa laran.
Nia esplika, kazu asaltu malu entre grupu rua neebe akontese iha festa kazamentu lokaliza iha Aldeia Akanunu, Suku Hera, Postu Admnistrativu Kristu Rei, Munisípiu Dili, hodi rezulta lezadu ema nain rua hetan kanek kmaan, uma tolu hetan estragus, motor haat rahun, kadera, meza inklui mos ekipamentu muzika toka festa nian, hanesan organ, kuluna no sasan seluk tan hetan estragus.
“Vítima ba kazu krime nee hamutuk nain 12 mak agora dadaun detein ona iha sela detensaun Komando PNTL Munisípiu Dili, oras 72 hafoin submete ba Ministériu Públiku hodi partisipa Primeira interogatoriu iha Tribunál,” hatete Komandante PNTL, Munisípiu Dili, Komisariu Asistente Polísia Orlando Gomes, ba jornalista sira iha nia knaar fatin Komando PNTL Kaikoli, Segunda (11/05/2026).
Nia koalia, iha suspeitu nain 12 mak deskobre ona, no autor hirak neebe seidauk kaer sei kaer hotu.
“Iha sira nain 12 mak agora daudaun ita detein ona oras 72 hafoin aprezenta ba Ministériu Públiku,” nia informa.
Nia esplika, ba kazu krime nee Polisia investigadór submete ona ho prosesu ho flagrante delitu no rejista ona ho númeru NUK 146/26DIBCR.
“Polisia kontinua buka tuir nafatin autor hirak neebe mak ba sobu ema nia festa no autor hirak neebe mak halo asaun krime estraga ema nia sasan barak iha festa nia laran, Komando PNTL sei bolu sira hodi asume responsabilidade ba sira nia hahalok neebe mak sira halo,” nia deklara.
Tuir Komisáriu Asisténte nee katak, autor sira nia asaun brutal nee halo komunidade sira paniku, tanba nee polisia sei la tolera, polísia sei halo operasaun hodi kaer hotu.
“Prosesu nee kontinua lao hela, no investigasaun mos kontinua atu bele buka tan ema sira neebe mak envolve iha laran. Maibe suspeitu nain 12 neebe iha ona sela detensaun aban ita sei aprezenta ba iha Tribunál,” nia relata.
Nia hatutan, Komando orienta ona ba Eskuadra Krstu Rei hodi bolu Xefe Suku, Administradór Postu sira, atu hamutuk haree situasaun ida nee.
Tanba asaun krime neebe akontese iha Akanunu Hera nee rezulta komunidade balun kanek, maibe vítima sira evakua hotu ona ba hospitál hodi hetan tratamentu intensivu.
“Ba kazu nee, Polisia kontinua mantein halo operasaun ba iha area Akanu Hera, kazu refere hakarak ka lakohi tenke ba oin,” nia afirma.
(jen)
