DILI, STLTIMORLESTE.com — Polísia Nasionál Timor-Leste (PNTL) Munisípiu Dili kaptura suspeitu ida alegadamente envolve iha kazu asaltu no estragus ba uma no motorizada iha Bebonuk.
Komandante PNTL Munisípiu Dili, Komisáriu Asistente Polísia Orlando Gomes hatete, akontesimentu ne’e akontese kalan iha Bebonuk, depois grupu joven sira envolve iha desentendimentu.
“Problema komesa ho dezentendimentu, antes suspeitu sira alegadamente halo asaltu no estraga janela, sasan no motorizada vítima nian,” hatete Orlando Gomes ba jornalista sira iha nia servisu fatin, Kinta-feira (01/10/2026).
Nia esplika katak, vítima sira tenta sai hosi área ne’e atu fila ba uma, maibé suspeitu sira alegadamente tuir no kontinua halo violénsia.
Hafoin simu informasaun, ekipa patrulha PNTL halo monitorizasaun iha área akontesimentu no fó atendimentu ba vítima sira.
Polísia lori vítima sira ba eskuadra atu hetan asisténsia no halo deklarasaun kona-ba akontesimentu ne’ebé sira enfrenta.
Tuir PNTL, hafoin rekolla informasaun no evidénsia, polísia konsege kaptura suspeitu ida ne’ebé alegadamente envolve iha kazu ne’e.
Orlando hatete, identidade suspeitu nian identifika bazeia ba informasaun no evidénsia ne’ebé rekolla durante investigasaun.
“Ita sei kontinua investigasaun atu identifika no buka suspeitu sira seluk ne’ebé posivelmente envolve iha akontesimentu,” informa Orlando Gomes.
Nia hatete katak, kazu ne’e sei prosesu tuir prosedimentu investigasaun no dispozisaun lei ne’ebé vigora iha Timor-Leste.
Nunee mos Juventude Bebonuk, Carlito Ximenes akresenta, akontesimentu akontese tuku 22:45, bainhira grupu joven hasoru vítima no baku, antes tuir vítima to’o uma.
“Iha kontesimentu ne’e polísia to’o kedas iha fatin. Maibé kauza prinsipál seidauk klaru tanba vítima no suspeitu balun lori ba polísia,” afirma Carlito.
(jen)
