DILI, STLTIMORLESTE.com – Polisia Nasional Timor Leste (PNTL) halo ona mapamentu Route (Blokia) temporariu neebe aban sei uza hodi halo muvimentu ba transladasaun ba Matebian Saudozu Eis Prezidente Republika, Francisco Guterres Lu-Olo nian.
“Husu apoiu ba sidadaun hotu-hotu ba fatin neebe mak ami sei blokia, husu ita boot sira pasiensia no avontade atu labele liu fatin ida neeba, tanba fatin aban sei blokia, depois prosesu remata ita boot sira kontinua uza,” hatete Portavoz Polisia Nasional Timor Leste (PNTL), Superintendente Polisia João Belo Dos Reis ba jornalista sira liu husi Konferensia Imprensa iha KomJer Dili, Kinta (25/06/2026).
Nia tenik, tuir planu operasaun neebe iha nee liu husi Komando PNTL Munisipiu Dili, apoiu husi Unidade Espesial Polisia (UEP) no Unidade Polisia Maritima (UPM) sei ho esforsu tomak hodi halo segurasa ba serimonia ikus ba deskansa nian.
“Ita nia membru sira nee ita koloka hotu ona iha fatin sira nee, inklui mos fatin ikus nian ba ita nia Eis Prezidente Republika Francisco Guterres Lu-Olo,” nia deklara.
Iha fatin hanesan, joven Calisto da Silva informa, dalan taka loron ida nee laiha problema, tanba Timor Leste daudaun nee lakon nia lider, eroi ida, tanba nee aban Sesta feira tenke pasiensia no akompanha Saudozu Francisco Guterres Lu-Olo ba fatin ikus nian.
“Hau senti dalan sira nee taka laiha probelma, tanba ita lutu metan ba ita nia aman ida neebe husik ona ita ba mundu seluk, ita hotu triste, tanba nee ita aban pasiente hotu-hotu akompaha no fo onra ba ita nia Saudozu Lu-Olo ba fatin ikus nian, tanba loron aban, loron ikus ba saudozu hamutuk ho ita,” nia informa.
Entretantu dalan Publiku neebe sei blokia mak Farol Avenida Portugal tasi bun nia sei taka, avenida Lurumata dalan IOB, avenida Prezidente Niculau Lobato (CCF) no Prezidente Nicolau Lobato, Rua Vila Verde Katedral taka, avenida Prezidente Nicolau Lobato QG F-FDTL, avenida Prezidente Niculau Lobato Palasiu Presidente Aitarak laran, dalan Colmera, Rotunda Madarin Hotel Timor, Palasiu Governu, ACIT, PN, dalan PN, Banco Mandiri, Tasi Ibun, Palasiu Governu, MJDC, Largo Lesidere, Rotunda Bidau, Ponte Kuluhun, Diresaun Bekora, Hera, Metinaro taka hotu.
(jen)
