DILI, STLTIMORLESTE.com – Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) hamutuk ho Diresaun Servisu Intelijensia Polisial (DSIP) kontinua halo operasaun ba atividade Scam Call Center tolu iha fatin sira hanesan Santa Cruz, Bebonuk no Vila Verde.
Porta Voz Komando PNTL, Superintendente Xefe Polísia João Belo dos Reis hatete, iha loron 11 Agostu, oras tuku 11:00 kalan too loron 12 Agostu tinan 2026, tuku 04:00 Madrugada, kontinua halao operasaun konjunta hodi foti asaun ba atividade kriminal sira neebe deskonfia sai ameasa ba estabilidade no Seguransa Nasional.
Nia dehan, alvu operasaun, intervensaun ba rezidensia komunidade balun neebe aluga ba sidadaun estranjeiru sira, tanba deskonfia forte ba atividade ilegal Scam Call Center. Nunee iha Operasaun Konjunta nee konsege desmantela tan rede Scam Call Center tolu iha fatin sira hanesan Santa Cruz, Bebonuk no Vila Verde.
“Iha lokalizasaun Santa Cruz no Bebonuk, ekipa deskonfia forte katak suspeitu sira hamriik iha rede ida deit, nunee ami konsege detein sidadaun estranjeiru hamutuk nain 5 kompostu husi Sidadaun Xineza nain 4 no Sidadaun Indonezia nain 1, ho evidensia sira neebe ekipa prende mak hanesan Aparelu Starlink ho ninia Router hamutuk Set 2, Komputador Laptop hamutuk Unidade 17, Komputador Desktop hamutuk unidade 2, relefone (Samsung & iPhone) hamutuk unidade 20,” hatete Portavoz Komando PNTL, Superintendente Xefe Polísia João Belo dos Reis ba jornalista sira liu husi konferensia imprensa iha Komando Jeral PNTL, Dili, Kuarta (12/8/2026).
Nia esplika, estatutu Jurídiku husi Kazu ida nee ekipa rejista ona ho Numeru Prosesu NUC 0297/26-PNSIC.
“EEkipa konjunta kontinua halao intervensaun ba rezidensia ida neebe aluga husi sidadaun estranjeiru sira iha area Vila Verde (Aldeia Lemorai) no konsege detein sidadaun estranjeiru hamutuk nain 9, kompostu husi Sidadaun Xineza nain 8 no Sidadaun Vanuatu nain 1,” nia informa.
Entretantu evidensia hirak neebe prende mak hanesan aparelu Starlink hamutuk unidade 2, Komputador Laptop hamutuk unidade 2 no telefone hamutuk unidade 2. Estatutu Jurídiku husi kazu ida nee ekipa rejista ona ho Numeru Prosesu NUC 0287/26-PNSIC.
(jen)
