ERMERA, STLTIMORLESTE.com – Komandante Polisia Nasional Timor Leste (PNTL) Munisipiu Ermera, Superintendente Xefe, Ludgerio Picansio Madeira Lay laiha informasaun ba atividade fatin prostituisaun iha Merkadu Railaku.
“Dezde hau mai fila-fila husi Oecosse asumi kargu iha Munisipiu Ermera, hau seidauk rona informasaun ida kona-ba atividade prostituisaun iha Merkadu Railaku,” hatete Komandante PNTL Munisipiu Ermera, Superintendente Xefe, Ludgerio Picansio Madeira Lay ba jornalista sira iha Suku Matata, Postu Administrativu Railaku, Munisipiu Ermera, Kuarta (28/05/2026).
Nia teknik, prostituisaun iha Merkadu Railaku, PNTL laiha informasaun, maibe PNTL mos uluk ba sobu balkaun neebe sira uza hodi faan Pop Mie.
“Hau Komandante Eskuadra nain rua neebe mak durante asumi kargu iha Railaku, sira rasik laiha informasaun konaba ida nee, sira mos dala ruma rona husi ema dehan hanesan nee maibe na-realidade laiha akontese neeba, maibe dala ruma sira hanoin sala, iha momentu neeba ami ba sobu duni iha balkaun nia okos nee, tanba sira faan sasan no faan pop mie iha neeba,” nia deklara.
Nia informa, orientasaun husi Prezidente Autoridade Munisipiu Ermera katak, merkadu nee utuliza ba faan modo, sira neebe faan pop mie tenke faan iha liur.
“Iha momentu neeba nee ami ba sobu duni fatin sira neebe halo ba kuartu- kuartu iha balkon okos nee, mais nee sira tau sasan faan sate no faan pop mie, depois segundu sira ba fase merkadu, sira la hatene atividade hanesan nee, maibe husu took sira neebe koalia nee tenke klarifika, ita koalia tenke ho dadus, ita labele hamoos espekulasaun neebe makam bele fo impaktu neebe la diak ou bele halo dezentendimentu komunidade sira nian,” nia koalia.
Iha fatin hanesan, Xefe Sentru Saude Postu Administrativu Railaku, Duarte Amaral hatete, teste rezultadu pozitivu HIV nain 5 nee laos afeitadu husi Merkadu Railaku, maibe joven nain ida neebe hetan moras infeksaun husi fatin seksual livre nee iha Merkadu Railaku nee nain ida.
“Joven ida neebe hetan infeksaun husi fatin Merkadu Railaku nee, nee nia ba halao relasaun iha Merkadu laran mak hodi hetan infeksaun nee, maibe ida nee akontese iha 2025, laos tinan 2026 nee laiha,” nia informa.
Nia koalia, maibe iha joven ida aprezenta iha sensibilizasaun HIV nian iha Railaku Karaik katak hetan informasaun husi Jestaun Merkadu Munisipiu Ermera katak sira ba sobu fatin prostituisaun iha merkadu laran, maibe sira Jestaun Merkadu ba haree iha haris fatin mak deskonfia ema halao relasaun seksual iha haris fatin merkadu Railaku.
“Jestaun Merkadu haree buat balun iha haris neebe mak bele liga mos ba neeba, maibe laos fatin ida iha neeba para hodi propiu ba ida nee laiha, maibe iha haris fatin Jestaun Merkadu deklara iha haris fatin neebe iha merkadu laran nee iha mos buat balun neebe la diak, entaun berati iha merkadu mos iha ema balun neebe mak halao atividade relasaun seksual livre,” nia hatutan.
Nunee nomos iha Autoridade Lokal balun iha Railaku neebe lakohi temi naran esplika katak, relasaun ho informasaun neebe STL media ho RTTL fo sai katak iha deskonfia Merkadu Railaku harii duni fatin prostituisaun, maibe nee akontese iha tinan 2024 no 2025, daudaun nee laiha tanba sobu ona.
“Ita nia Administrador koalia nee los, komu nia laiha dadus neebe kompletu atu koalia ho media, maibe fatin prostituisaun iha merkadu Railaku nee iha duni, ema halao duni atividade seksu livre, maibe akontese nee iha tinan 2024 no 2025, agora laiha tanba fatin nee sobu ona, depois fatin prostituisaun ida tan iha Gleno maibe ita nia PNTL sobu ona foin dadaun nee,” nia afirma.
(jen)
