MANATUTO, STLTIMORLESTE.com — Komando Polisia Nasional Timor Leste (PNTL) Manatuto kontinua hasae vizibilidade liu husi atividade patrulhamentu no polisiamentu komunitáriu, ho objetivu atu mantein estabilidade no situasaun seguransa iha territóriu Manatuto.
Komandante Polísia Nasionál Timor Leste (PNTL) Munisípiu Manatuto, Superintendente Xefe Polísia Joni Viana das Regras hatete, atividade patrulhamentu nee halao husi unidade no postu sira iha munisípiu, liu husi aprosimasaun direta ho komunidade, vizita eskola no dialogu ho sidadaun sira, atu hametin kooperasaun entre polísia no komunidade.
“Hau hanoin, tanba ita uza filosofia polisiamentu komunitáriu. Portantu kada komandante eskuadra iha postu neen nee sira halo sira nia funsaun no halo patrulhamentu hodi hasae vizibilidade, halo aprosimasaun ho komunidade,” hatete Komandante Polísia Nasionál Timor Leste (PNTL) Munisípiu Manatuto, Superintendente Xefe Polísia Joni Viana das Regras ba STL hafoin partisipa abertura perfurasaun mármore We-UAH iha Ilimanu, Munisípiu Manatuto, Sesta (07/08/2026).
Nia esplika, polisiamentu komunitariu sai parte importante husi estratejia PNTL Manatuto atu prevene krime no garante ambiente seguransa neebe hakmatek, liuhusi prezensa polísia neebe besik liután ho komunidade.
Nia informa, bazeia ba avaliasaun provizóriu ba tinan 2026, kazu sira iha Manatuto haree menus kompara ho tinan kotuk. Nia atribui situasaun nee ba atividade polisiamentu komunitariu neebs kontinua hadia, liu husi patrulamentu, vizita eskola no diálogu ho komunidade.
“Ita haree tinan ida nee kazu menus kompara ho tinan ba kotuk, tanba atividade polisiamentu komunitariu nee ita melhora tan, oinsa atu halo atividade patrulhamentu, vizita eskola, halo mós diálogu ho komunidade sira para bele koopera ho PNTL, nunee ita bele garante estabilidade hakmatek iha Manatuto,” nia deklara.
Nia informa, maski atividade polisiamentu kontinua halao, PNTL Manatuto sei hasoru dezafiu iha asesu ba area rural sira neebe dook, tanba nee kondisaun jeográfika iha fatin balun presiza apoiu transporte neebe diak atu fasilita movimentu polísia sira.
“Agora nia dezafiu mak fatin balun dook husi rural, presiza ita tenke transporte ida di’ak para bele too iha fatin sira rurál nee,” katan nia.
Kona-ba situasaun seguransa, nia espika, maski iha kazu krime balun akontese iha fatin balun, hanesan Postu Administrativu Laklubar, Orlala no Bairru Sertula, situasaun jeral hahu husi Janeiru too agora sei kontroladu.
Nia koalia, PNTL mos koloka efetivu iha Postu Sertula no Cribas atu responde ba nesesidade seguransa no halo monitorizasaun iha komunidade sira.
“Felizmente, situasaun iha jeral hahu husi Janeiru too fulan ida nee provizoriamente sei kontroladu, mesmu ita rejsita krime balun akontese iha fatin balun,” katak nian.
Nia subliña katak, iha jerál, ambiente seguransa iha Manatuto sei hakmatek no seguru.
“Portantu hau bele dehan situasaun maka ida nee, felizmente iha jeral Manatuto ambiente hakmatek no seguru,” nia konklui.
Iha fatin hanesan, Komunidade Munisipiu Manatuto, Abilio Tavares Maia informa, Munisipiu Manatuto laran sempre halo patrulhamentu iha Munisipiu laran no situasaun iha Munisipiu laran kontinua hakmatek laiha problema.
“Ami Munisipiu Manatuto laiha problema no situasaun hakmatek, tanba ita nia Polísia kalan-kalan sempre halo patroillamentu,” nia afirma.
(jen)
