DILI, STLTIMORLESTE.com – Komando Polísia Nasionál Timor Leste (PNTL) liu husi Segundu Komandante PNTL Munisípiu Dili, Superintendente Xefe Polísia Luís da Silva hatete, preparasaun seguransa ba atividade selebrasaun jogu Kopa Mundial no Loron Mundial Oseanu iha Dili preparadu.
Nia dehan, autoridade sira garante katak medida seguransa nee sei aplika hodi asegura ordem publiku, seguransa komunidade no fluidez tranzitu durante eventu sira neebe sei realiza iha c
Kapital.
“Ita prepara ona planu operasaun kompletu inklui distribuisaun membru sira ba fatin estratéjiku iha área hotu-hotu iha Dili, hodi asegura atividade lao ho normal husi hahu too remata,” hatete Segundu Komandante PNTL Munisípiu Dili, Superintendente Xefe Polísia Luís da Silva ba jornalista sira iha Komando Jeral PNTL Kaikoli, Dili, Segunda (08/06/2026).
Nia esplika, Komando PNTL mos orienta unidade operasionál no tránzitu atu regula movimentasaun viatura, inklui eventual taka no loke dalan tuir nesesidade, hodi garante seguransa durante konvoi no pawai.
Nia informa, PNTL fo mos autorizasaun ba adeptus no grupu apoiu sira atu halo konvoi selebrasaun, maibe husu atu partisipante sira tenke kumpri Kodigu Estrada no regra seguransa.
Entretantu PNTL alerta katak ema neebe la uza kapasete ka halo asaun kontra lei tránzitu sei enfrenta medida legal tuir prosedimentu. PNTL apela ba komunidade tomak atu kolabora ho autoridade sira, mantein disiplinadu no respeita regra seguransa atu selebrasaun Kopa Mundial no Loron Oseanu bele lao ho dame, seguru no susesu.
(jen)
