AMBENO, STLTIMORLESTE.com – Hafoin Detidu Cancio Mauno halai lakon husi Guarda Prizioneiru nain 3 sira nia liman iha Tribunal Primeiru Instansia Distritu Oecusse (TPIDO) Semana kotuk, orientasaun Komandu Polisia Nasional Timor Leste iha Rejiaun Administrativa Espesial Oecusse-Ambeno (PNTL-RAEOA) lidera husi husi Superintendente Xefe Polisia, Nicolau Francelino da Costa orienta ba Xefe Seksaun Investigasaun, Ajente Xefe Polisia, Candido Ulan Sila ho SNI konsege kaptura ona Prizioneiru refere no asegura ona iha Sela Komando Polisia Oecusse.
Tuir Komandante PNTL Rejional Oecusse, Superintendente Polisia, Nicolao Francelino da Costa ba STL iha Oecusse, Kinta (28/05/2026) katak, hafoin detidu halai sai husi Guarda prizaun sira nia liman iha TPIDO, informa ba Komandu PNTL Oecusse, nunee orienta kedan ba ekipa PNTL serbisu hamutuk ho Serbisu Nasional Intelijensia (SNI), konsege kaptura ona detidu nee iha tuku 1:00 oras Timor Leste (TL) iha ninia uma rasik iha Bairru Bione, Aldeia Makelab, Suku Taiboko, Postu Administrativu Pantemakassar RAEOA.
“Presiza atu informa katak, relasiona ho detidu neebe halai sai husi seguransa Prizaun sira nia liman, iha loron Sabadu (23/05/2026) semana kotuk, iha oras tuku 6 lokraik, depois de ida nee siguransa prizaun la konsege asegura iha areador TPIDO, halai sai kuaze loron 3 ka loron 4 ona, tanba nee ohin lokraik porvolta tuku 1:00 lokraik konsege kaptura fali detidu nee iha ninia rezidensia iha Bairru Bione, Aldeia Makelab, Suku Taiboko Oecusse no dadaun asegura ona iha Sela komando PNTL-RAEOA hodi kontinua halo prosesa tuir lei, tanba tenta halai ses husi justisa,” dehan nia.
Detidu Cancio Mauno neebe simu pena prizaun Preventiva iha Prizaun Becora, bain hira tuir julgamentu iha TPIDO, halai lakon husi Guarda prizioneiru nain 3 sira nia liman iha Oecuse ho nia kronolojia akontesementu, detidu nee akompanha husi Guarda Prizioneiru nain 3 ho kareta prizaun nian, neebe kareta para deit iha areador TPIDO iha semana kotuk.
Detidu nee ho Naran Cancio Mauno, ba-bain bolu Nakeol Poto, neebe tuir julgamentu iha Tribual Oecusse, wain hira guarda Prizaun nain rua ba han meudia, hela deit prizioneiru ida deit maka hein detidu nee, maibe la azema (Borgol) prizioneiru nee nia liman.
Detidu Cancio Mauno halai husi areador TPIDO, tanba la iha fatin ba prizioneiru sira neebe maka mai julgamentu iha Oecusse no detidu halai sai husi areador TPIDO tanba falta kontrola husi guarda prizaun neebe akompanha prizioneiru nee hodi tuir julgamentu iha Oecusse.
Tuir Xefe Suku Taiboco, Mateus Naas sente kontente tanba detidu nee konsege kaptura fali ona husi autoridade seguransa, atu prosesa tuir lei neebe iha.
“Hau ohin simu informasaun husi Xefe Grupo bairru, Bairru Bione Akdeia Makelab Simao Nesi katak, nia ho familia hetan detidu nee iha ninia uma, entaun informa kedan ba parte seguransa no konsege kaptura no asegura ona iha Sela Polisia, hau la hatene nia sala saida ba nia kazu nee too tama komarka, maibe derpenti halai sai husi seguransa prizaun sira nia liman, bain hira mai tuir julgamentu halai lakon, agradese ba Xefe Grupo Bairru Bione ho Familia nomos Autoridade seguransa PNTL ho SNI, konsege kaer ona detidu nee,” dehan Xefe Suku Taiboko, Mateus Naas.
Detidu nee ho Naran Cancio Mauno, husi Bairru Bione, Aldeia Makelab, Suku Taiboco, Postu Administrativu Pantemamasaar RAEOA.
“Bainhira hau rona informasaun nee, hau orienta kedan Xefe Aldeia ho komunidade inklui familia detidu iha Bairru Bione, liu-liu joventude sira, alerta atu kontribui buka tuir no konsege hetan no entrega ona ba autoridade Seguransa. Hau konhese detidu nee husi Hau Nia suku Taiboko, Aldeia Makelab, Bairru Bione, Hau agradese ba informasaun nee atu aviza ba hau Nia komunidade sira hodi kolabora ho Polisia iha Oecusse,” dehan Xefe Suku Taiboco, Mateus Naas.
Relasiona ho detidu neebr halai sai husi areador TPIDO, Ministru Justisa, Sergio Hornai orienta ona ba Autoridade seguransa iha Oecusse atu halo desmantelentu hodi hola medida tuir lei, atu kaptura fali priozioneiru nee.
“Hau fo ona orientasau ba Autoridade kompetente atu halo koordenasaun ho instituisaun estadu ninian, atu bele haree oinsa maka atu halo desmantelamentu, hodi halo medidas tuir lei haruka para hetan fila fali prizioneiru nee, sei karik nia sei iha teritoriu nasional Timor Leste (TL), konserteza ita sei halo vizilansia, halo serbisu ho parelhu sira neebe maka ita para bele, entermus de institusional, ita koordena par abele detekta ninia paradeiru para halo medidas ba nia, para nia bele halo reintegrasaun fila fali ba iha serbisu prizionais ninian, ho ninia konsekuensia tanba tenta halai husi ninia responsabilidade, entaun sei iha medidas balu hanesan tuir sira nia lei kona ba medidas pena ninian,” dehan Ministru Justisa, Sergio da Costa Hornai.
(jos)
