DILI, STLTIMORLESTE.com – Polisia Nasionál Timor Leste (PNTL) liu husi Departamentu Investigasaun Kriminal (DIK) sei halo investigasaun ba kazu neebe akontese iha Hospital Nasional Guido Valadares (HNGV), pasiente ho naran Januario Marcal neebe mate tanba atendimentu husi estajiariu nomos kazu ida neebe sidadaun ida mate iha ai-riin eletrisidade.
Porta voz PNTL, Superintendente Polisia João Belo dos Reis dehan, asidente ida rua neebe espalha iha media sosiál katak, preokupasaun publiku nian neebe indikasaun ba krimi neebe akontese.
“Ida ita foti ema mate iha riin eletrisidade iha Same, no ida iha HNGV, asaun sira neebe mosu halakon ema nia vida pur ejilensia PNTL sei halo intervensaun hodi halo investigasaun atu hatene verdade husi kazu nee bele aprezenta ba Ministeriu Publiku,” hatete Superintendente Polisia João Belo ba jornalista sira, liu husi Konferensia Imprensa neebe iha Komando Jeral PNTL Kaikoli, Dili, Kuarta (16/04/2025).
Nia tenik, Ekipa Departamentu Investigasaun Kriminal (DIK) perepara ona atu tun hodi halao investigasaun ba kazu neebe akontese iha HNGV nomos sidadaun ida mate iha riin eletrisidade.
“Wainhira iha indikasaun krimi ita sei aprezenta ba Ministeriu Publiku hodi bele responde iha neeba, tanba komunidade persiza halo investigasaun, tanba nee ita prontu suporta atu halo prosesu investigasaun,” nia deklara.
Nia hatutan, kazu neebe akontese iha HNGV nee seidauk bele hatene, tanba investigasaun lao mak foin hatene lo-loos katak ida nee mal partika, neglijensia ou planeadu.
“Kazu neebe mak krimi publika ita la persiza hein keixa, Polísia hatene Polísia halo intervensaun no bele halo investigasaun,” nia informa.
Iha fatin hanesan, Visi Diretor HAK, Antonino de Limas deklara, kazu sira hanesan iha HNGV neebe akontese kona-ba mal pratika iha HNGV nee persiza halo investigasaun klean, atu nunee bele hatene motivu lo-loos nee.
“Mediku sira tenke halo knaar ho didiak, atu nunee labele akontese tan, estajiu sira labele fo atendimentu mesak ba pasiente maibe mediku sira mos bela akompanha, tanba nee ema nia vida,” nia informa.
Nunee Diretor Servisu Apoiu Diagnostiku no Terapeutico iha HNGV, Vidal de Jesus Lopes afirma, PNTL mai ona terenu no halo ona investigasaun ba kazu nee, tanba laiha mediku ida ou staf ida hakarak pasiente nee lakon vida.
Nia hatutan, inprinsipiu laiha mediku sira no staf laiha intensaun aat ba kualker atendimentu sempre servi ho domin ba pasiente hotu-hotu ho responsabilidade.
“Ami simu ona relatoriu husi mediku sira neebe tama rotasaun nee, tanba nee ita sei kria ekipa independente ida para hodi halo investigasaun ba akontesimentu ida nee para ita bele hatene informasuan nee ho loos,” nia afirma.
(jen)
