DILI, STLTIMORLESTE.com – Liu husi komunikadu husi media PNTL neebe STL asesu katak, Diresaun Servisu Investigasaun Kriminal (DSIK) husi Polísia Nasionál Timor Leste (PNTL) simu keixa ofisiál husi imigrante Índia hamutuk ema nain 33 neebe alegadamente deskonfia sai vítima ba krime trafiku humanu iha Timor Leste.
Hafoin simu tiha keixa nee, ekipa investigadór DSIK hahu kedas halo prosesu investigasaun no bolu jerenti kompahia Simrn Kour Vijay Enterprise, Lda, ho naran inisial BS, atu fo klarifikasaun konaba prosesu rekrutamentu no entrada sidadaun Índia sira mai Timor Leste.
DSIK sei halibur evidénsia, rona deklarasaun husi vítima sira, testemunha no parte relevante hotu atu hatene lo-loos faktu sira no determina se iha violasaun ba lei konaba trafiku humanu ka krime seluk neebe relasiona ho kazu ida nee.
Daudaun nee ekipa DSIK sei halo identifikasaun no loke prosesu investigasaun ho profisionál, imparsial no tuir dalan legal, ho objetivu atu garante prosesu justisa lao ho transparensia no responsabiliza ema neebe prova katak komete aktu kriminal.
Ekipa DSIK- PNTL nia kompromisu atu proteje direitu umanu no asegura seguransa ba sidadaun hotu, inklui sidadaun estranjeiru sira neebe hela no servisu iha Timor-Leste. Tanba PNTL apela ba komunidade atu nafatin kolabora ho autoridade sira no fo informasaun neebe bele ajuda investigasaun.Kazu ida nee dadaun sei iha prosesu investigasaun, no PNTL sei fo informasaun ofisial ba publiku bainhira iha dezenvolvimentu foun tuir interese investigasaun.
(jen)
