DILI, STLTIMORLESTE.com – Polisia Nasional Timor Leste (PNTL) liu husi Servisu Migrasaun, Servisu Informasaun Polisia no Diresaun Servisu Investigasaun Kriminal (DSIK) dezmantela tan rede Scam Call Centre no asegura sidadaun estranjeiru nain 7 iha area Becora.
Operasaun nee realiza hafoin ekipa Servisu Sekreta Servisu Migrasaun rekolha informasaun husi fontes akreditadu sira iha loron Sabadu nee no konsege identifika atividade rede Scam Call Centre ida iha Area Bedois, Suku Becora, Postu Administrativu Cristo Rei, Munisipiu Dili.
Iha operasaun nee ekipa servisu konsege prende ekipamentu no objetu balu iha uma arendamentu laran inklui sidadaun Indonezia nain 6 (feto 3 mane 3) no Xinez mane 1 neebe aluga uma refere.
Tuir deklarasaun uma nain, David Menezes katak, uma nee sidadaun estranjeiru kazal ida mak mai aluga. Sira mak sosa kadeira meza, kama no instala internet starlink besik fulan ida ona maibe selu uluk fulan tolu nian no kada fulan sira selu osan ho montante US$ 2500.00.
Hafoin halo aprensaun ba sidadaun estranjeiru hirak nee, ekipa servisu kontatu kedas ba DSIK, hodi mai lori sira nain 7 no objetu sira nee ba asegúra iha edifisiu PNTL hodi submete ba prosesu investigasaun.
(jen)
