DILI, STLTIMORLESTE.com – Portavos Polisia Nasional Timor Leste (PNTL), Superintendente Xefe Polisia João Belo dos Reis hateten, Diresaun Servisu Investigasaun Kriminál (DSIK) submete ona kazu ema neebe ho moras mental sona ema nain 4 ba Ministeriu Públiku (MP).
“Akontesimentu maluk sira akompanha horiseik, purvolta tuku 17:00 loraik, ita nia sidadaun husi Oekusi, ita bele konsidera nia moras mental neebe konsege halo asaun sona ema nain 4, rezulta labarik ida tinan 7 mate iha tempu neeba, sira seluk neebe mak nain ba iha relasaun família direta mos hetan kanek hotu no agora mos halo hela tratamentu iha hospital. Kazu nee rasik ami rejista ona ho nia NUC 0253/2026, Dom Aleixo nian,” hatete Portavos Polisia Nasional Timor Leste (PNTL), Superintendente Xefe Polísia João Belo dos Reis ba jornalista sira iha nia knaar fatin Komando Jerál PNTL Kaikoli, Tersa nee (07/04/2026).
Komandante nee esplika, polísia identifika sidadaun nee ema moras mentál duni.
“Sim, identifika duni nia moras mentál no rejista duni ba iha nia tratamentu neebe ita asesu fila fali no durante nee ita asesu mós katak nia durante nee halao hela durante nee nia tratamentu iha moras mental,” nia informa.
João Belo ladún hatene sidadaun nee moras mentál ho tipu saida, atu identifika ida nee so parte tekniku sira mak bele esplika.
“Maibe iha informasaun no nota sira neebe ita hetan, katak durante nee nia halao hela tratamentu iha hospital,” nia haktuir.
Tuir Superintendente Xefe Polisia João Belo katak, polisia asegura ona ema nee iha fatin seguru balun.
“Horiseik ita enkamina kedas ba iha parte saude ninian para halo teste, loos duni ga lae, depois ita mos hetan dokumentu sira nee, pois ita asegura lai iha fatin balun,” nia koalia.
Entretantu kazu tentativa omisidiu agravadu ho arma branka akontese iha Aldeia Naroman, Suku Madohi, Postu Administrativu Dom Aleixo, tuku 15:59 OTL, rezulta vítima nain 4, nain 1 mate kedas iha fatin no nain 3 seluk hetan kanek todan.
Tuir informasaun neebe STL asesu iha terenu, labarik mane ida neebe mate kedas iha fatin ho naran kumpletu Reinaldy dos Santos, tinan 7 no feto minor ida hetan kanek todan iha kotuk laran, joven ida ho idade 19 anos hetan kanek iha kotuk laran, nomos iha sidadaun ida neebe tenta hadau tudik husi suspeitu mos hetan kanek.
(jen)
