DILI, STLTIMORLESTE.com – Maske Vise Ministra Finansas atualiza katak taxa pobreza tun ona husi 41% iha 2014 ba 37% iha 2024, maibe Akademista sira konsidera numeru nee seidauk faktual los no seidauk reflete realidade moris povu kiik nian iha terrenu.
Vise Ministra Finansas (V-MF) Regina de Jesus foin lalais nee atualiza relatóriu Sumáriu kona-ba Pobreza iha Timor-Leste. Relatóriu ne’e hatudu katak durante periodu tinan 10, taxa pobreza tun deit pontu persentual 4, husi 41% iha tinan 2014 ba 37% iha tinan 2024.
Kona-ba kestaun ne’e, Akademista UNPAZ, Jose de Araujo hatete, maske numeru hatudu tun, maibe realidade iha terrenu seidauk reflete duni redusaun pobreza nee.
“Numeru tun husi 41% ba 37% nee diak, maibe ita tenke haree didiak metodolojia ne’ebe uza. Se ita haree ba kustu moris ne’ebe sa’e makaas agora, 37% nee seidauk faktul los,” Jose de Araujo hatete ba STL, iha Dili, Kinta
(17/09/2026).
Nia hatutan, redusaun 4% durante tinan 10 nee kiik tebes kompara ho orsamentu boot, ne’ebe Governu gasta ona tinan-tinan ba programa kombate pobreza.
Tuir nia, Governu presiza halo estudu klean liu tan, laos haree deit ba numeru, maibe haree mos ba asesu ba bee moos, edukasaun, saude no empregu ne’ebe povu kiik sira hetan.
“Se ita dehan pobreza tun, maibe iha foho ema sei hamlaha, labarik barak sei malnutrisaun no joven barak sei dezempregu, entaun definisaun pobreza nee presiza revee fali,” nia dehan.
Nia husu ba Ministeriu Finansas no Estatistika atu halo peskiza ne’ebe transparente no inkluzivu, hodi hatudu dadus real kona-ba moris povu nian iha area rural no urbana.
Iha parte seluk, Observador Ekonomia, Daniel de Oliveira hatete, relatóriu ne’ebe Vise Ministra Finansas fo sai nee labele sai deit numeru iha papel, maibe Governu tenke tradus ba asaun konkreta hodi kria kampu servisu no hasae rendimentu agrikultor sira nian.
“Se pobreza tun duni, povu tenke sente. Maibe ohin loron folin sasan sa’e, servisu laiha, agrikultor sira nia produtu folin tun. Entaun Governu presiza halo intervensaun ekonomia ne’ebe direita ba povu kiik,” Daniel de Oliveira hateten.
Entretantu antes nee Vise Ministra Finansas (V-MF), Regina de Jesus atualiza relatóriu Sumáriu kona-ba Pobreza iha Timor-Leste husi tinan 2014 ho 41% to iha tinan 2024 tun ba 37%.
Tasa kiak ba tinan 2024 nee bazeia ba Relatóriu rezultadu sira hosi Peskiza Kondisaun Moris Timor-Leste nian (TLSLS) 2024, aprezenta dadus atualizadu sira kona-ba insidénsia no karakterístika sira pobreza nian iha nasaun.
“Rezultadu sira hatudu katak taxa pobreza nasionál tun hosi 41,8% iha 2014 ba 37% iha 2024, redusaun ida hosi pontu persentajen 4,8 iha dékada ikus ne’e. Pobreza kontinua iha insidénsia aas liu iha zona rurál sira, ne’ebé afeta 45,5% hosi populasaun, kompara ho 18,4% iha zona urbana sira, ho diferensa sira mós entre munisípiu sira,” haktuir komunikadu neebe STL asesu husi Governu.
(car)
