BAUCAU, STLTIMORLESTE.com – Komando Polísia Munisípiu Baucau husu joven sira evita tur iha fatin públiku liu hosi tuku 22:00 kalan, hodi prevene perturbasaun no mantén estabilidade iha Baucau.
Komandante Komando Polísia Munisípiu Baucau, Superintendente Xefe João Sancho Pires, hateten seguransa la’ós responsabilidade Polísia de’it, maibé presiza kooperasaun husi komunidade hotu.
“Seguransa hahú husi uma laran. Autoridade Suku, veteranu, lider partidu no komunidade hotu tenki kontribui atu kria estabilidade,” hateten João Sancho Pires ba Jornalista sira iha Vila Nova Baucau, Kuarta (23/09/2026).
João Sancho Pires hateten, situasaun seguransa iha Munisípiu Baucau la’o di’ak, maski iha problema ki’ik balu ne’ebé presiza atensaun husi parte hotu.
Tanba ne’e husu ba joven sira atu aproveita tempu ba servisu no atividade produtiva hodi sustenta nesesidade moris duké tur iha fatin públiku durante kalan.
“Husu ba alin joven sira aproveita tempu halo servisu, duké tur iha fatin sira liu hosi tuku 22:00, tanba kalan tempu deskansa nian,” Pires apela
Bainhira parte Polísia hetan jovem sira ne’ebé tur iha fatin públiku iha tempu kalan. Nia hateten Polísia iha dever atu orienta no haruka sira fila ba uma.
Orientasaun ne’e, tuir João Sancho Pires, importante atu prevene situasaun ne’ebé bele hamosu perturbasaun seguransa iha komunidade.
Komandante Polísia Baucau mos hateten nia orienta ona Polísia Eskuadra no xefe seksaun sira atu hala’o patrulla iha área sira ne’ebé konsidera presiza.
“Se lakohi fila ba uma, Polísia bele lori ba edifísiu, bolu inan-aman entrega sira, tur-tur bele dada malu no hamosu buat seluk. Tanba ne’e, ita presiza evita atu labele mosu perturbasaun,”
Nia apela ba komunidade atu koopera ho Polísia no responde ba orientasaun sira, liuliu iha oras kalan.
Komandante ne’e mos husu media atu ajuda fahe mensajen seguransa ba komunidade, hodi prevene problema no promove estabilidade.
Nia konklui, Komando Polísia Munisípiu Baucau kontinua halo patrulla no monitorizasaun iha área sira, nu’udar parte husi esforsu atu mantén ordem no seguransa públika iha Baucau.
(tom)
