BAUKAU, STLTIMORLESTE.com – Komando Polisia Munisipiu Baukau sei prosesu kazu asidente trafiku neebe akontese iha area Madoma, Aldeia Betulale, Suku Vemasi, Postu Administrativu Vemasi ba Ministeriu Publiku (MP).
Asidente nee akontese iha loron 14 Maiu 2026 parte loraik involve husi karreta Estudu sapa matrikula 05-469 G diresaun husi Baukau ba Dili iha neebe too area Madoma, Aldeia Betulale, Suku Vemasi, Postu Vemasi soke sidadaun jovem feto nain tolu (3), rezulta Inacia H. do Santos idade 18 mate fatin, Belina Pedrita Faria idade 18 kanek iha parte rentos no inus enkuantu Livania da Costa Pereira idade 15 trauma.
Komandante Polisia Munisipiu Baukau, Superintendente João Sancho Pires aprezenta, hafoin asindente nee akontese, parte Polisia Eskuadra Postu Vemasi too kedas fatin halo atusaun.
“Nia dala ruma halai lansadu halai sai husi dalan, dala ruma hakfodak too ikus labarik nain tolu neebe ba tuir drumband 20 Maiu nian, konsege soke hela sira nain tolu,” hateten Komandante Polisia Munisipiu Baukau, Superintendente João Sancho Pires ba jornalista sira iha nia knaar fatin, Vila Nova Baukau, Sesta (15/05/2026).
Nia sublina, hafoin parte Polisia Eskuadra Postu Vemasi too fatin halo atusaun kontaktu kedas Polisia Seksaun Tranzitu husi Komando Polisia Munisipiu Baukau too fatin hodi kontratu Sentru Saude Vemasi evakua vitima ba Hospital no ekipa tranzitu kontinua halo identifikasaun ba lokal asidente.
Nia fundamenta, remata identifikasaun iha lokal asidente karreta estadu refere husi Ministeriu Agrikultura Pekuaria Peskas no Floresta konduz husi VG idade 51 tula pasajeiru nain 3 mak hanesan, Asesor Prinsipal, Xefe Gabinete inklui funsionariu ida husi Ministeriu refere.
“Sira nee ba Vikeke halao servisu Ministeriu nian orsida prosesu mak ita haree, trazitu nafatin loke prosesu kazu nee iha fali ida familia sira negosia ba malu,” Pires komenta.
Komandante Polisia Munisipiu Baukau nee deklara, mezmu hafoin asidente parte Diresaun husi Ministeriu refere hamutuk ho familia koalia oan prosesu rezolve tuir dalan familia, maibe parte Komando Polisia Munisipiu Baukau sei prosesu ba Ministeriu Publiku ho numuru kazu 0043/26 BeSTR.
Iha sorin seluk Motorista ba karreta estadu sapa matrikula 05.469 G husi Ministeriu Agrikultura Pekuaria Peska no Floresta (MAPPF), VG hateten, Gabinete refere husi Dili ba Munisipiu Vikeke ho ekipa karreta Estadu 3 halao servisu Governu nian, tanba lori dokumentus importante ba Ministru Agrikultura Pekuaria Peskas no Floresta asina no aproveita tempu hatoo sentidu kondolensia ba Ministru nia inan mate.
Hafoin remata atividade fila husi Munisipiu Vikeke tuir informasaun neebe espalha, asesor hadau xave husi kundotor hodi konduz karreta fila atu ba Dili too iha Baukau hetan asidente nee, VG rejeita, nee laloos.
“Laiha nee orientasaun husi Xefe Gabinete nia mos hanesan asesor prinsipal ami ho karreta tolu lao ho ekipa ami fila mak hanesan nee,” VG katak
Motorista nee hateten, durante konduz karreta refere sai husi Munisipiu Vikeke tuir dalan sente kondisaun diak, deskansa dahuluk nian iha area Vikeke no too Kaisidu Suku Tirilolo Baukau Vila mos sei deskansa hafoin kontinua viajem atu ba Dili, maibe too iha area Vemasi derepente hasoru asidente refere no la lembra velosidade husi konduz karreta.
“Kuandu kolen sempre deskansa lao diak hela too mai Vemasi nian mak derepente hanesan nakukun, hau hakfodak karreta halai tiha ba estrada ninin. Hau la lembra,” VG hateten.
Nia sublina, hafoin infrenta asidente refere komunidade sira iha area refere inklui jovem sira konsege halo agresaun fiziku hasoru nia, maibe la kleur Polisia Eskuadra Postu Laleia, Munisipiu Manatuto too kedas fatin asidente evakua motorista inklui pasajeiru sira husi karreta Estadu neebe involve iha asidente nee.
“Ida nee primeira vez akontese iha hau nia moris, hau sente triste tebes, asidente nee ita la espera hau mos iha familia se mak hakarak lakon nia ema, hau mos laiha planu atu akontese hanesan nee, parte ida hau simu, tanba hau mak lori karreta,” VG espresa.
Motorista ba asidente nee rekonhese, nia parte mak konduz karreta refere rezulta ema lakon vida no kanek, tanba nee prontu kopera ho dezisaun familia no justisa, maibe liu husi apoiu Governu nian ba vitima nee ajuda balu ba seremonia funebre mate bian nian.
Entretantu evidensia hanesan karreta Estadu sapa matrikula 05-469 G asegura ona iha edifisiu Polisia Eskuadra Postu Vemasi enkuantu motorista VG iha edifisiu Komando Polisia Munisipiu Baukau hodi hein prosesu tuir mai.
(tom)
