DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Munisipiu Dili hamutuk ho Diresaun Nasional Transportes Terrestres (DNTT) sei kontrolu komunidade sira iha sidadad Dili neebe iha kareta ho motor, tenke iha parajen.
Komandante Tranzitu no Rodoviária Munisípiu Dili, Superintendente Asistente Polísia, Delfim da Silva hatete, Dirasaun Tranzitu Munisipiu Dili hamutuk ho DNTT sei halo kontrolu kareta motor iha kapital Dili, tanba maioria komunidade iha kareta ho motor maibe fatin parajen laiha.
“Ita halo ona koordenasaun ho ekipa DNTT atu haree sidadaun neebe iha kareta ho motor tenke iha mos parajen, labele para kareta ho motor iha dalan publiku,” hatete Komandante Tranzitu no Rodoviária Munisípiu Dili, Superintendente Asistente Polísia, Delfim da Silva ba STL iha Komando PNTL Munisipiu Dili, Kuarta nee (29/07/2026).
Nia esplika, operasaun kalan-kalan iha bairu-bairu, liu-liu iha dalan protokolu sira sei kontrolu, labele para arbiru iha dalan publiku.
“Ita nian mensajen ida ba ema hotu-hotu, karik hola motor ho kareta tenke para iha nia fatin, tanba nee hanesan ita nia riku soin, kuandu para iha dalan ninia la seguru, kontra sinais, ba tilan ona, entaun relativamente ba iha ekonomia familia, nee hasai osan tenke ba selu, estraga karik se mak hasai osan ba hadia,” nia tenik.
Nia informa, Komando PNTL Munisipiu Dili halo ona koordenasaun ho parte DNTT sira atu nunee kuandu sira hola motor ho kareta tenke kria kondisaun ruma, nomos identifika katak motor ho kareta nee tenke parajen iha, labele para hotu iha dalan, tanba nee mak operasaun nee kontinua tama sai bairu sira hodi hateten ba nain tenke para iha fatin, se lae ida nee difikulta fali servisu operasaional polisia nian no forsa sira nian.
“Situasaun ruma ita atu tama la diak, tanba kareta ho motor mak para hela iha dalan nee okupa hotu estrada, ita tama la diak, neebe operasaun nee sei kontinua, se ba dalan boot no sei ba iha bairu-bairu,” nia koalia.
Iha fatin la hanesan, Ana Maria Belo nuudar kareta nain deklara, kareta ho motor iha sidade Dili nee barak no para arbiru iha dalan publiku no iha bairu-bairu, tanba nee parabens ba PNTL ho DNTT nia servisu bele kontrola kareta ho motor sira para arbiru.
“Polísia tenke kontrola makaas ba kareta ho motor sira neebe kalan-kalan para iha estrada Publiku nomos iha bairu laran, kareta sira nee mak halo movimentu ba mai la diak, sempre akontese engrafamentu iha sidade Dili,” nia afirma.
(jen)
