DILI, STLTIMORLESTE.com – Ministru Negosiu Estranjeiru no Kooperasaun (MNEK) Portugal, Paulo Rangel hatoo apresiasaun ba preparasaun Timor Leste (TL) atu halao Reuniaun Ministerial no Reuniaun Konselhu Ministru Komunidade Nasaun sira Koalia Lian Portuges (CPLP).
Apresiasaun nee hatoo husi Ministru Negosiu Estranjeiru no Kooperasaun Portugal, Paulo Rangel bainhira halao enkontru kortezia ho Primeiru Ministru (PM), Kay Rala Xanana Gusmão iha Palasiu Governu, Dili, Kuarta lokraik (19/08/2026).
Paulo Rangel agradese ba PM Xanana Gusmão no Governu TL simu delegasaun Portugal no preparasaun neebe halao hodi garante susesu reuniaun CPLP, neebe halao iha ambitu selebrasaun aniversariu ba dala-30 CPLP.
“Parabens ba ita boot sira, kona ba organizasaun perfeita reuniaun ministerial ida nee nian, ho rezultadu interesante tebes. Buat hotu prepara ho diak tebes husi TL,” dehan MNEK Portugal, Paulo Rangel.
Ministru Negosiu Estranjeiru Portugal mos hatoo agradesimentu husi povu Portuges tomak ba TL, liu-liu kona ba apoiu neebe TL fo ba kandidatura Portugal atu sai membru Naun Permanente iha Konselhu Seguransa Nasoins Unidas.
Enkontru kortezia nee mos aborda asuntu sira relasiona ho CPLP, liu liu kooperasaun iha area lian Portuges no relasaun bilateral entre TL no Portugal.
Iha biban nee, PM Xanana Gusmão hateten, enkontru nee nuudar enkontru kortezia, neebe fo oportunidade ba parte rua atu koalia informalmente kona ba CPLP no kooperasaun entre TL no Portugal.
“Ministru Negosiu Estranjeiru no Kooperasaun Portugal, Paulo Rangel, mai TL ba dala-rua ona. Antes iha 2024, agora mai partisipa iha Reuniaun Konsellu Ministrus CPLP. Ami hasoru malu koalia oitoan kona ba CPLP rasik, kooperasaun Portugal ho Timor. Nee duni ami koalia liu deit tanba nee nuudar reuniaun kortezia,” akresenta Xefe Governu.
Iha enkontru nee, PM Xanana Gusmão akompanha husi Visi Ministra Negosiu Estranjeiru no Kooperasaun, Jesuína Maria Ferreira Gomes, Embaixador Portugal iha TL, Duarte Bue Alves no Xefe Gabinete Primeiru Ministru, Elizabeth Exposto, halao iha palasiu Governu Dili.
(jos)
