DILI, STLTIMORLESTE.com – Portugal sei hasoru Kroasia iha faze eliminasaun, liu tiha ekipa rua nee asegura pozisaun nuudar segundu klasifikadu iha faze grupu Kopa Mundial 2026. Jogu determinadu nee sei halao iha toronton Stadium, Kanada.
Portugal okupa fatin daruak iha grupu K ho pontu 5, hafoin empata 0-0 hasoru Kolombia iha Miami. Selesaun neebe lidera husi Kapitaun Cristiano Ronaldo nee konsege rejista vitoria ida no empata rua durante faze grupu. Ronaldo mos foin lalais nee marka istoria foun nuudar jogador primeiru neebe tau golu iha Kopa Mundial neen neebe la hanesan.
Iha parte seluk Korasia mos remata nuudar segundu klasifikadu iha grupu L ho pontu neen, hafoin manan Ghana 2-1 iha fali konfrontu ikus. Ekipa neebe lidera husi Luka Modric nee la konsege duni Inglatera neebe lidera klasifikasaun grupu refere ho pontu hitu.
Tuir kalendariu neebe determina ona jogu entre Portugal no Kroasia sei halao iha data Kinta feira, 2 Julhu 2026 (Oras Kanada) / Sesta feira, 3 Julhu 2026 (Oras Timor Leste). Oras 08: 00 OTL (Oras Timor Leste/ 19:00 ET. Fatin Toronto Stadium, Kanada.
Manan nain husi jogu nee sei avansa nuudar kualifikadu ba faze dezasseis nian (16), hodi hasoru ekipa neebe manan husi konfrontu entre Espana ho Áustria.
Jogu boot nee mos dada atensaun husi Francisco Noronha, nuudar adeptu selesaun Portugal iha Timor Leste. Nia hatoo ninia komentariu hodi hateten katak, nia sente katak Portugal hasoru Korasia nee nuudar dezafiu boot ida, maibe nia nafatin optimista katak selesaun nee bele sai husi presaun hodi manan fali jogu refere.
“Hau hanoin jogu entre Portugal ho Kroasia iha eliminasaun nee nuudar dezafiu boot, maibe ho suporta husi adeptu sira no mos tatika neebe metin, oportunidade nafatin nakloke ba ekipa hodi hakat ba oitavu final,” dehan Francisco ba STL, Tersa nee (30/06/2026).
Nia hatutan, importante liu mak jogador linha kotuk sira tenke konsentra no labele halo fali falta ruma iha area penalti nian, tanba Korasia iha jogador sira neebe matenek tebes hodi aproveita oportunidade oi-oin.
(car)
