DILI, STLTIMORLESTE.com – IX Governu Konstitusional agradese ba populasaun sira iha territoriu nasional neebe hatudu sentidu no respeitu aas ba Saudozu Francisco Guterres Lu-Olo nia mate, durante lutu nasional.
Primeiru Ministru Interinu, atual Vise Primeiru Ministru, Ministru Kordenador ba Assuntu Sosiais, Mariano Assanmi Sabino hateten, governu agradese ba entidade hotu-hotu neebe durante nee kolabora diak tebes wainhira Governu Dekreta Lutu Nasional hodi fo omenajen ba Saudozu Eis.Prezidente Republika, Francisco Guterres Lu-Olo nia falesimentu.
“Hau hakarak hatoo agradesimentu boot liu ba povu Timor-oan tomak no ba instituisaun publiku no privadu hotu-hotu tanba sira hatudu respeitu aas.durante loron hitu Lutu Nasional neebe Governu dekreta,” dehan Mariano Assanmi ba jornalista sira liu husi Konferensia Imprensa iha Palasiu Governu, Segunda (29/06/2026).
Governante nee afirma, prezensa povu iha serimonia funebre no omenajen oi-oin iha rai laran hatudu katak povu fo rekonhesimentu klean ba legadu husi Saudozu Francisco Guterres Lu-Olo neebe dedika nia moris tomak ba luta independensia no konstrusaun estadu Timor Leste.
Nia mos konsidera Saudozu Francisco Guterres “Lu Olo” nia espiritu nafatin inspira Timor oan hotu atu servisu hamutuk, respeitu malu, kaer metin unidade nasional hodi dezenvolve Timor Leste ba oin ho prosperu.
“Lori Governu nia naran, dala ida tan hau renova hau nia kondolensia klean liu ba familia enlutada no agradese ba povu Timor-oan hotu-hotu tanba solidariedade no ezemplu sivizmu neebe fo ba ita-nia rain,” tenik nia.
Primeiru Ministru interinu nee mos agradese ho maneira espesial ba Forsa Defeza Timor Leste no Polisia Nasional Timor Leste, autoridade relijioza, profissionais saude, orgaun komunikasaun sosial sira, no instituisaun privadu sira neebe ho dedikasaun, profisionalizmu no espiritu misaun kontribui ba serimonia hotu-hotu lao ho dignidade, ordem no respeitu.
(alb)
