DILI, STLTIMORLESTE.com – Reprezentante Povu husi Bankada FRETILIN, Deputadu Antoninho Doutel Sarmento, afirma povu iha baze presiza solusaun konkreta, laos promesa deit ba problema ne’ebé sira infrenta hanesan sidadania, saúde no edukasaun.
Deputadu ne’e hato’o preokupasaun ne’e, relasiona ho situasaun real ne’ebé povu hasoru loron-loron iha area rural no urbana.
“Povu iha baze sei hasoru problema barak, problema sidadania ne’ebé to’o agora la rezolve, problema saúde ne’ebé fasilidade menus, no problema edukasaun ne’ebé estudante sira hasoru hela. Ne’e preokupasaun boot ba ami hanesan reprezentante povu,” dehan Deputadu Antoninho Doutel Sarmento ba STL, iha Dili, Kinta (24/06/2026).
Tuir nia, problema sidadania sai preokupasaun boot tanba sidadaun barak sei hasoru difikuldade atu hetan dokumentu estadu nian, hanesan kartaun eleitoral, billete identidade no sertidaun RDTL.
Kondisaun ne’e difikulta povu atu asesu ba servisu públiku, no programa sosial husi governu.
Iha setór saúde, Deputadu Antoninho, destaka katak povu barak sei hasoru difikuldade atu asesu ba atendimentu saúde ne’ebé dignu no ho alta kualidade, liu-liu iha área remotas.
Fasilidade saúde ne’ebé menus, aimoruk ne’ebé la sufisiente no profesional saúde ne’ebé limitadu sai obstakulu ba povu nia moris diak.
Iha parte edukasaun, nia sublinha katak estudante sira sei infrenta problema oioin, hanesan kondisaun eskola ne’ebé la adekuadu, no laiha kualidade, falta fasilidade aprendizajen, no difikuldade ekonomia ne’ebé halo estudante balun tenke husik eskola.
Deputadu nee husu ba governu atu tau atensaun seriu ba problema baze ne’e, liu-liu polítika ne’ebé liga direta ho povu nia moris loron-loron.
Tanba nee nia dehan, governu presiza buka solusaun konkreta no laos retorika deit, hodi rezolve problema sidadania, saúde no edukasaun ne’ebé povu hasoru durante ne’e.
Iha parte ketak Observador Politika, Manuel de Araujo konsidera preokupasaun husi Deputadu Antoninho,hanesan refleksaun ba realidade sosial povu nian.
“Deputadu nia preokupasaun ne’e loos duni, tanba problema sidadania, saude no edukasaun mak problema fundamental ne’ebé povu hasoru bebeik. Governu tenke hatudu seriedade liu husi asaun konkretu iha terrenu, laos hakerek deit iha planu,” dehan Manuel.
Entretantu Akademista UNTL, Daniel Soares hateten problema tolu ne’e presiza hetan atensaun integradu husi governu.
“Problema sidadania, saude no edukasaun iha ligasaun ba malu. Se sidadaun la iha dokumentu kompletu, sira labele asesu ba edukasaun no saude ho diak. Tanba ne’e presiza solusaun sistemiku no sustentavel husi estadu,” Daniel sublinha.
(car)
