DILI, STLTIMORLESTE.com — Eis lideransa rezisténsia Leandro Isaac husu lider polítiku sira atu labele halo povu ne’ebé luta ba liberdade sai vítima dala rua iha rai ne’ebé sira luta atu hetan liberdade.
Eis deputadu Partidu Sosiál Demokrata (PSD) no eis Koordenadór Konsultasaun Populár 1999 hosi CNRT, Leandro Isaac, hato’o apelu ba na’i ulun, liu hosi entrevista ho STL, iha Dili, Kinta (08/10/2026)
Nia husu ba lider polítiku sira atu rona povu nia lian no foti desizaun ne’ebé fó resposta ba nesesidade sira.
Leandro fó hanoin kona-ba terus no sakrifísiu povu Timor-Leste, durante tinan 24 rezisténsia kontra okupasaun rai-li’ur.
Nia subliña katak, povu rasik mak sai autór ba libertasaun nasionál, liuhusi Konsultasaun Populár iha 30 Agostu 1999.
“Keta halo povu tanis ba dala rua. Tanis dahuluk tanba funu, tanis daruak tanba falta justisa no lialo’os.”dehan Eis Deputadu nee.
Leandro dehan, tanis daruak la’ós tanba konflitu armadu, maibé tanba povu sei hasoru problema no husu justisa iha rai libertadu.
Nia husu ba na’i ulun sira, atu fó atensaun sériu ba povu nia lian no evita desizaun ne’ebé aumenta frustrasaun iha sosiedade.
Leandro hateten, valór lialo’os no justisa ne’ebé sosa ho ran no mate, tenke sai baze ba futuru Timor-Leste.
Iha parte ketak Observador polítika, Samuel de Araújo konsidera deklarasaun Leandro nu’udar alerta ba lideransa polítika,kona-ba insatisfasaun povu ne’ebé kontinua mosu iha sosiedade.
Araújo dehan, apelu ne’e hatudu katak povu sei espera resposta konkretu hosi Estadu kona-ba justisa, igualdade no qualidade moris.
“Povu nia tanis ohin hatudu katak, lideransa seidauk konsege hatán ba espetativa justisa no igualdade.”dehan Samuel.
Nia konsidera tempu to’o ona ba governu no lider polítiku sira, atu husik interese pesoál ka grupu no tau interese povu iha oin.
Enkuantu, akademista Universidade Nasionál Timor Lorosa’e (UNTL), Pedro de Oliveira, konsidera krítika ne’e nu’udar sinal ba nesesidade reforma institusionál.
Oliveira esplika katak libertasaun nasionál la’ós de’it kona-ba troka bandeira ka hetan ukun-an, maibé mos kria instituisaun públika transparente.
Nia dehan instituisaun Estadu tenke servisu ho responsabilidade no igualdade, hodi garante povu sai benefisiáriu prinsipál hosi independénsia.
Bainhira povu sai autór ba independénsia, maibé sente katak justisa sosiál no ekonómika dook hosi sira, kríze konfiansa bele mosu.
“Demokrasia la’ós de’it votasaun iha urna, maibé oinsá podér ezerse ho étika no responsabilidade ba povu.”hatete Akademista nee.
Oliveira salienta katak akademia no sosiedade sivíl, sei kontinua sai matan no tilun ba povu hodi promove lia-lo’os.
Nia husu ba ukun-na’in sira atu labele haluha hun históriku 30 Agostu 1999, no tau povu iha sentru dezenvolvimentu nasionál.
Entretantu tanis povu nian labele konsidera nu’udar fraqueza, maibé nu’udar alerta katak sakrifísiu pasadu presiza hetan resposta konkretu iha tempu ohin.
(car)
